Spice Girls Reunion tour an ṭan ta

Fan-te'n hun rei tak ata nghakhlel taka an thlir ṭhin chu a takin thleng ta - Spice Girls chuan May 24, Zirtawpni zan khan reunion tour an ṭan. Keini ram hunah chuan Inrinni khan tour hi an kick-off a, mipuiin an hlut rem rem hle. 

British pop girl group hian Dublin, Ireland-ah tour hi an kick-off a, mi 70,000 chuang zet an pungkhawm a ni. Khawpui hrang hrangah show an nei zui dawn a, vawiin hian Cardiff, UK-ah concert an nei ang. 

Victoria tel lohna
A hmingah 'Reunion Tour' tih ni mah se member an kim thei lo a, Victoria Beckham chuan a zawm ve lo. Victoria hian reunion tour-a a tel loh tur thu hi a lo sawi lawk tawh a, fan-te lawm a kim lo. Victoria Beckham leh a pasal David Beckham-te chuan Spice Girls-te hi duhsakna an hlan a, tour hlawhtling tak nei tura an duh thu an tarlang a ni. 

Emma Bunton, Mel B, Melanie C leh Geri Halliwell-te chuan Victoria tel loh lang lo khawpin boruak an nei lian a, an concert chhimtu pawh an ṭhahnem hle. Croke Park, Dublin-ah mipui ṭhahnem tak an pungkhawm a, fan tam tak chu lawm avangin an zuang. An beisei angin thil a kaltluang lo hlauh thung a, sound system ṭhat tawk loh vangin mi eng emaw zatin stadium an chhuahsan. 

Hemi chungchangah hian Spice Girls pawhin thupha an chawi a ngai hial a, fan-te hriatthiamna an ngen. Melanie Brown chuan, "Sound chungchangah complain kan dawng nual a, a pawi kan ti hle. A lehpekah chuan a ṭha thei ang ber chhawpchhuah kan tum a, theihtawp kan chhuah dawn a ni," tiin a sawi. 

Firework
An inzawmkhawm tawh dawn lo emaw tih hnuah tour an neiho leh a ni a, fan-te mai bakah anmahni ngei pawh an hlim tih an hmelah a lang. Tour kick-off pawh an bei ropui rem rem hle a, an hla hit 'Spice Up Your Life' an sak laiin stadium chhung leh pawnah firework an kap chhuak chuai chuai a ni. 

Melanie Chisholm chuan, "He hmun (Dublin)-ah hian kum 1998 khan tour kan lo ṭan tawh bawk a, kan tan chuan a hlu hle a ni. Kan in ang maia kan ngaih a ni a, kan rilruah a thi tawh ngai lo ang," tiin kal khawm mipui hmaah thu a sawi zui bawk. Spice Girls hian kum 1990 chho a an hla hit hrang hrang an perform a, entu mipui lam pawh an thawm a ring ṭha hle. 

Mipui an lungawi lo
Spice Girls reunion tour hian music khawvel a chiah hneh hle a, a chhe zawng leh ṭha zawngin sawi a tam hle. An sawi vawng ber erawh sound sysytem ṭha tawk lo chungchang a ni a, demna thu an chhak chhuak nasa hle. Fan ṭhenkat chuan an zai a hriat theih loh bakah, an ṭawng tak ngial pawh an hre thei lo tih an sawi. Mi eng emaw zatin stadium an chhuahsan hial a, an lungawi loh thu an tarlang nasa hle a ni. 

Spice Girls hian Cardiff an pan zui nghal a, Manchester, Coventry, Sunderland, Edinburgh leh Bristol-ahte show an nei zui dawn a ni. A hmawr bawkna erawh UK-a stadium lar leh hmingthang Wembley Stadium-ah June 13 khian an nei ang.