Justin Bieber vangin Iceland canyon an khar!

Iceland-a Fjadrárgljúfur canyon hi tun hma chuan khawvela hmun mawi leh lar berte zinga mi a ni ngai lo, tunah erawh chuan tlawhtu an tam lutuk avangin khar a ngai hial!

Engdang vang a ni lo - Candian singer Justin Bieber chuan music video siamna hmun atan a hmang a, heta ṭang hian khawvelin a hmel­hriat chho ta a ni. A bik takin JB-a fan ten he hmun hi an ngaina a, kum tin mi makta­duai telin an tlawh phah a ni. Candian pop star Justin Bieber hian kum 2015 khan 'I'll Show You' music video a tichhuak a, shooting hi Fjadrárgljúfur canyon-ah hian a nei. A ram mawinate chu hmuh hmaih chi rual a ni lo a, lui leh phaizawl nawm hmel em em mai chuan mi a hip a ni. JB-a fan-te chuan he hmun hi tlawh an duh a, mi tam takin an pankhawm ta ruih ruih a ni. 

Mihring nuai thum chuang awrh chenna Iceland ram chuan khualzin maktaduai tam tak a dawl zo reng lo a, Fjadrárgljúfur canyon ngei pawh chu khar a ngaih phah ta hial a ni. Iceland hian kum khat­ah tlawhtu mi nuai ruk vel an nei ṭhin a, Justin Bieber-a music video chhuah hnuah erawh a let eng emaw zatin an pung. 

Nikhum chhung khan khualzin maktaduai 2.3 zetin Iceland hi an tlawh a, hei hi an ram mipui let eng emaw zat a ni. Environment Minister Gudmundur Ingi Gudbrandsson chuan, "Fjadrárgljúfur canyon hian tlawhtu a ngah em em a, kum telin an pung chho. Tun dinhmunah phei chuan enkawl theih baka tamin an tlawh a, hei vang hian khar lailawk a ngaih phah a ni," tiin, Fjadrárgljúfur canyon khar chhan a sawi. 

He thil hi Justin Bieber vang­a thleng a ti loh theih loh a, a tlawhtu tam tak pawh hi a fan ruhkhawlte an ni. A music video pawh hian en a hlawh hle a, viewer pawh maktaduai 400 chuang zet an awm tawh a ni. Fjadrárgljúfur canyon-ah hian mihring sulhnu hmuh tur a awm meuh lo a, hmunhma tam zawk hi chu leilung piankenin a din - mihringin an tihdanglam loh a ni. A hmun a thianghlim a, tlawh man hla tur tak pawh a ni.