Zanin Zonet-ah GREEN BAG i en thei dawn ta

Zonet leh M_Space Production-te kut chhuak Mizo film thar 'Green Bag' chu en theihin a awm dawn ta.

Hmanni lawkah Zonet leh M_Space hian Zoram mipuite tan Mizo film tawi hnuhnawm tak 'Mittui' min lo hlui tawh a, zaninah pawh kar tawp hawnna atan, mahni sitting room ngei aṭanga nuamsa taka kan en theih turin 'Green Bag' hi min rawn chhawp chhuah sak leh dawn a ni.

'Mittui' ang bawk khan short film a ni leh dawn a, minute 40 a pel hret dawn niin director Malsawma chuan Vanglaini a hrilh a, a khamawm loh leh dawn hle niin a lang. Helho hnena silai hralhna pawisa tam tham tak a bo avanga buaina chungchang chu he film-ah hian kan hmu dawn.

Director Malsawma Fanai (M_SPACE) hi Thingtlang Tlangval leh Kristian film Grace-te lo siam tawhtu tho kha a ni a, script ziaktu chu Central KṬP kumpuan film Hnehtu Screen play ziaktu David Lalrinsanga tho kha a ni bawk nen, a hmuhnawm hle turah beisei ang.
Mizoram pawna awmte leh TV lama en hman lote tan pawh ZONET ott platform : tv.zonet.in-ah pawisa tlemte chawiin a en theih reng dawn a ni.