Dota: Dragon’s Blood Netflix-ah en theihin a awm tawh

Dota player-te'n an nghahhlelh Dota: Dragon’s Blood chu Netflix-ah en theihin a awm tawh a, Dota khel ṭhinte character hmelhriat hmuh tur an awm nual.

Valve game hit behchhana siam Dota: Dragon’s Blood hi anime series-in Netflix lamah hian en theihin dah a ni a, episode pariat awmin dragon knight 'Davion'-a chanchin a ni ber a, Princess Mirana nena an intawn dan leh Davion-a leh Slyrak inzawmna neih dan chungchang vel a ni.

Luna, Terrorblade leh Selemene-te pawh hmuh tur an awm a, Dota khel ngai lem lo tan pawh hmuhnawm tih tur a ni a, chutih rual chuan he series review-tu ṭhenkhat chuan Dota 2 player-te beisei ang thil hmuh tur a tam lo nia sawite pawh an awm ve nawk tho a, chu chu an duh khawp lohna ber pawh niin a lang.

Chutihrual chuan an 'action' a hmuhnawm a, a hlimawm bawk a, a game khel ve lem lo tan phei chuan en manhla tak a ni tho mai. Episode pariat chauh a la ni bawk nen, season 2 an tichhuak leh a nih chuan film review-tu ṭhenkhat beisei angin character tam zawk pawh kan hmu tawh mahna.