GIG Motors Ṭhazual Lengzem-AH A hmun ngaiah HT Lalthanzami

Ṭhazual Lengzem chart-ah vawi eng emaw zat No.1 a lo hauh tawh a, a hla thar nen a hmun ngaiah a rawn kir leh ta. HT Lalthanzami chuan 'Hlimte'n leng ang che' tih hla hmangin GIG Motors Ṭhazual Lengzem chart-ah dinhmun sang ber a luah a, Fakmawia Fanai chu pahnihna a ni. 

Jenny Jathang chuan pa­thumna a hauh a, Zorinzuali Khiangte leh Awmtea Polymer te chu top 5-ah an lang bawk. 

Hlimte'n leng ang che
HT Lalthanzami hian March hla khan music video thar a tichhuak a, a hla hi 'Hlimte'n leng ang che' tih a ni. He hla hi Dina Jathanga phuah a ni a, a thu a rem khawm fuh cher cher hle. Dina Jathang hian Ṭhazual chart-a lang phak hla a nei nual tawh a, tun ṭuma mi pawh hi a 'hit' hle. 

Lalthanzami hian a sa nalh a, a aw nen pawh a inmil hle a ni. Ṭhazual chart-ah zawi zawiin hma a sawn a, thla hnih pawh a ral hmain No.1 a kai ta hial a ni. 

Fakmawia Fanai chuan 'I hmangaih ber' tih hla hmangin pahnihna a hauh a, Jenny Jathang chuan 'Nang nen' tih hla hmangin a dihmun a sawh nghet bawk. Zorinzuali chuan 'Ka rawn hlan' tih hla hmangin palina a hauh a, a hnuaiah hian Awmtea Polymer leh Chama Thangluah te an awm a ni. 

David Lalremruata chuan a hla thar 'Nuimawite' tih hla hmangin pasarihna a hauh nghal a, ani hi 'Jerusha' lo larpui tawh a nih avangin hma a sawn zel a rinawm. Pariatna luahtu hi HT Lalthanzami tho a ni a, 'Di rialin' tih hla hmangin top 10-ah hla hnih  a thawh a ni. 
Vawi eng emaw zat 'Sensiari' tih hla hmanga No.1 lo hauh tawhtu Fela Colney chu pakuana a ni a, Temami chu top 10-ah an lang bawk.