Mumbai-a Bank Day Celebration-ah SBI Aizawl Team lam dawn
State Bank of India (SBI) chuan July 1 khian Mumbai-ah Bank Day Celebration an nei dawn a, he hunah hian SBI Aizawl Team te chu lam tura thlan zingah an tel.
Bank Day Celebration-ah hian India ram hmun hrang hrang aṭangin thlan bikte an inlan dawn a, a thlanna pawh hi uluk taka kalpui a ni. North East Circle aṭanga perform tur thlanna hi May 25, Inrinni khan Pragjyoti Cultural Center, Guwahati-ah neih a ni a, hmarchhak state hrang hrang aṭangin team kua lai an inlan.
He hunah hian cultural item hrang hrang, hnam lamte leh drama hmangin intihsiak neih a ni a, Mumbai-a perform turin team pathum an tling a ni. Chung zingah chuan Aizawl Team hi an tel a, Agartala Team leh Guwahati Team te chu thlanchhuah an ni bawk.
Aizawl Team te hian cheraw chu main dance-ah hmangin, a bulṭan nan choreography, modern style nena mix an hmang. SBI theme pakhat, Transform and Live Long (TALL) tih chu an lamah hian an zep tel bawk a ni. Aizawl Team-te hi Mizoram chhunga SBI Branch hrang hrang aṭanga lam thiam thlan khawm an ni a, Mumbai kal turin ngawrh takin an inbuatsaih zui a ni.