Box Office-ah John Wick 3 a daih rei lo Sum lalut hnem ber Aladdin
North America Box Office-ah roreltu an inthlak leh ta a, tun hnaia film chhuak thar Aladdin chu a chungnung ber. Aladdin hian John Wick: Chapter 3 - Parabellum chu a khum a, sum lalut hnem ber a ni.
John Wick 3 hian dinhmun sang ber luah ve bawk mah se a daih rei lo hle a, American actor Will Smith channa Aladdin a ngam lo nghal a ni.
Hei le Aladdin
May 22 khan Hollywood movie chhuak thar a awm a, a hming chu Aladdin a ni. He fantasy/romance film hi May 22 khan Sweden-ah tlangzarh a ni a, khawvel hmun hrang hrangah thawm a nei lian hle.
North America bikah chuan $mtd 86.1 zet lalutin Box Office-ah No.1 a hauh nghal. British actress leh singer ni bawk Naomi Scott channa a nih miau avangin dah hniam chi rual a ni lo a, sum pawh a thawk chhuak hnem hle. Khawvel hmun hrang hrang aṭanga a sum lakluh tawh zat hi $mtd 207 zet a ni a, a namai lo hle.
Aladdin hi kum 1992 khan tihchhuah a lo ni tawh a, British film director Guy Ritchie chuan a rawn siam thar leh a ni. He film-ah hian Will Smith, Naomi Scott leh Canadian actor Mena Massoud-te an chang a, a siam nan hian $mtd 183 zet an hmang a ni.
John Wick 3
Kar hmasa lamah khan No.1 a hauh a, tum ṭumah erawh $mtd mtd 24.4 lalutin pahnihna a ni. Canadian actor Keanu Reeves leh American actress Halle Berry-te channa John Wick 3 hi May 15 khan tlangzarh a ni a, a sum lakluh tawh zawng zawng chu $mtd 181 a ni.
American film director leh stuntman lar Chad Stahelski-a kutchhuak film John Wick 3 hi Avengers : Endgame No.1 aṭanga nek chhuak thei hmasa ber a nih miau avangin dah hniam theih a ni lo.
Endgame-in hma sawn zel
Khawvela film hlawhtling ber ni thei dinhmunah a din mek avangin ngaihven a hlawh lo thei lo a, a sum lakluh zat hi chhut mite ngaihtuahna la pengtu a ni.
American film director lar Anthony Russo leh Joe Russo-te kutchhuak Avengers: Endgame hian tun thlengin $tld 2.68 zet a lalut tawh a, Avatar a hnaih sawt hle.
Canadian filmmaker lar James Cameron-a kut chhuak Avatar hian $tld 2.78 lalutin, khawvela film hlawlting ber dinhmun a luah mek a, amah hnaih bertu chu Endgame hi a ni. An inthlauhna hi a zim sawt em avangin record duhawm tak a chelh mek hi hloh thei dinhmunah a ding mek a, Avengers: Endgame hian a khum thei ang em tih chu khawvelin a thlir ṭhup a ni.
Avengers: Endgame hian tun weekend chhung khan $mtd 16.8 lai a thawk chhuak leh a, Avatar nen an inkar a sawr zim zel.
Sum lalut hnem zual top 3
1. Avatar - $tld 2.78
2. Avengers: Endgame - $tld 2.68
3. Titanic - $tld 2.18
Tun ṭumah hian Pokémon Detective Pikachu chuan $mtd 13.3 lalutin palina a hauh a, Brightburn leh Booksmart-te'n an dawt. A Dog’s Journey, The Hustle, The Intruder leh Long Shot-te chu sum lalut hnem zual zingah an lang ve leh bawk.