Thlawhtheihna chesualah Gabriel Diniz a thi

Brazilian singer Gabriel Diniz chu Thawh­ṭanni khan thlawhtheihna chesualah a thi. Kum 28 mi Gabriel Diniz thih thu hi a tirah puanzar a ni lo a, a hnuah a chhungten an puang­zar ta chauh a ni. 

Pop star Gabriel Diniz hi a bialnu Karoline Calheiros piancham lawm turin Salvador-Deputado Luís Eduardo Magalhães International Airport aṭangin Maceió-Zumbi dos Palmares International Airport panin pilot pahnihte nen an thawk chhuak a, vanduaina an tawk zui ta a ni. 

Thlawhtheihna hi Porto do Mato, Estância-ah a tla a, a chuang mi pathumte hi an thi vek tih media te chuan an tarlang. Gabriel Diniz thih thu hian mipui a barakhaih hle a, amah bakah a bialnu Karoline Calheiros-te chuan khawngaihtu leh lainattu an ngah hle. 

Diniz hian kum 2016-a a tihchhuah 'Paraquedas' a larpui hle a, nikum September thla khan single 'Jenifer' a tichhuak bawk. A hla thar phei hi chu YouTube-ah pawh mi maktaduai 230 chuang zetin an view tawh a ni. Gabriel Diniz hi Latin lamah chuan a lar hle a, YouTube-ah subscriber  maktaduai hnih chuang a nei a, Instragram lamah pawh maktaduai 4.5 lai follower a nei a ni.