Katy Perry-in a music video tharah nau a pai tih a lantir

American singer, kum 35 mi Katy Perry chuan Nilaini khan music video thar Never Worn White a tichhuak a, he video tawp lamah hian a rai tih a tilang.

A pasal hual Orlando Bloom nen hian an innei dawn hnai nia tarlan a awm fo tawh a, tunah erawh a rai thu hian sawi zui a hlawh leh tawh hle. Never Worn White  video a tihchhuah hnu lawk hian Instagram-ah live zuiin a fan-te hnenah tun nipuiah hi chuan naute thar an neih hman dawn thu a sawi zui bawk.

"Nipuiah hian thil tam tak thleng tur a awm. Naute thar ka neih tur chauh hi ni lo, thildang in nghahhleh em em pawh a thleng dawn a ni. Double whammy tiin sawi phawt mai ang aw," a ti. A nau pai thu chu a thuruk zep rei ber a ni tih a sawi bawk a, music kaltlanga a fan-te hnena hrilh chu a puanzar dan ṭha ber nia a hriat thu a sawi bawk.