Vanglaini logo

June 5-ah CMT Music Award Country singer rual perform dawn

Mipui vote hmanga thlan CMT Music Award chu June 5 hian Bridgestone Arena, Nash­ville-ah sem a ni leh dawn a, country singer rual an inlan dawn. 

Award ceremony-a perform tur zingah Keith Urban leh Sheryl Crow-te chu hming langsar an ni a, Zac Brown Band, Brandi Carlile leh Tanya Tucker-te hming a ri ring viau bawk. 

Mipui vote
Country music huanga award ngaihhlut tak pakhat CMT Music Award hi kum tin sem ṭhin a ni a, mipui vote hmanga thlan ṭhin a nih avangin ngaihhlut a hlawh hle. 

Kum 1967 aṭang daih tawh khan sem ṭan a ni a, kumtin Nashville, Tennessee-ah sem ṭhin a ni. Award dawng thei tura chhawp chhuahte aṭangin mipuiin duh an tlang ṭhin a, hei hian a hlutna a belhchhah hle. Hei hi country singer-te pawhin an hlutna chhan a ni. 

Tute nge perform dawn? 
CMT Music Award-ah hian country singer ṭha ber ber an perform dawn a, Brett Young, Zac Brown Band leh Brandi Carlile-te chu stage luahlumtu tur zingah an tel. Anni bakah hian Sheryl Crow, Tanya Tucker, Trombone Shorty leh Little Big Town-te chu hming langsar an ni bawk. 

Australian country singer ropui Keith Urban chuan a thiam thil a lantir leh dawn a, mipui chawk hlimtu tur ber zinga mi a ni. Luke Combs leh Boyz II Men-te an la awm cheu bawk. 

Kuminah hian nikum lam aiin perform tur an tam dawn a, perform ho tur pawh eng emaw zat an awm. Carlile chuan Tucker a zawm dawn a, Boyz II Men leh Young an inkawp dawn bawk. Heng bakah hian - Little Big Town + Trombone Shorty leh Crow + Maren Morris-te chu hmuh chakawm an ni. 

Carrie Underwood
Country music huangah chuan 'a serh zinga a mei ang' Carrie Underwood hming lam rik loh theih a ni lo. 'Jesus, Take The Wheel' singer hi CMT Music Award-a perform tur hming puan hmasak zingah khan a tel a, mipui hmuh chak a ni. 

Ani bakah hian Morris, Dan + Shay, Kane Brown, Kelsea Ballerini, Luke Bryan leh Tho­mas Rhett-te perform tur thu puan a lo ni tawh bawk.  CMT Music Award hi Ameri­can country music group, Little Big Town chuan an host leh dawn a, nikum khan an lo host tawh bawk a ni.