American-ten Facebook an khawih tlem tial tial
Market research company eMarketer zir chianna aṭanga a lan dan chuan, American-ten nikhata Facebook khawih nana hun an hman ṭhin chu a tla hniam tial tial.
US-ah chuan mipa puitlingin ni khatah chawhrualin Facebook khawih nan minute 41 an hmang ṭhin a, hei hi nikum chhung khan minute 38-ah a tlahniam. Kum khat chhunga a tlak hniamna hi minute thum a ni a, kumin chhungin minute 37-ah a tlak hniam beisei a ni.
eMarketer principal analyst Debra Aho Williamson chuan, "Facebook hian tlakhniam lam a pan hret hret a, ni khata hun sen ral nana an hman ṭhin pawh a hniam ve zel a ni," tiin a sawi. Williamson hian Facebook chu social media dangin an luahlan chho ve hret hret tih sawiin, American zingah phei chuan Snapchat hmang an pung tih a sawi. Snapchat khawih nan hian mi pakhatin ni khatah minute 26 vel zel hmang ang an ni a, Facebook nen an inthlauhna a tam lo hle.
Hetih lai hian Facebook hmangtu erawh kum telin an pung chho zel a, US-ah ringawt pawh mi maktaduai 169.5 zetin an hmang. Hei hi an rama mihring cheng zat aṭangin a chanve aiin a tam zawk a, nikum chhung khan 0.9% velin an pung a ni.