Zaninah LIBERTY for MYANMAR Charity Concert nei dawn

Social media lamah kan, ram milarte status leh an story vel aṭangin mi tam tak chuan kan hre tawhin a rinawm. 

Kan ṭhenawm ram, Myanmar buaina chungchang kan hre ṭheuh tawhin a rinawm a, chutah chuan kan Zohnahthlak unau tam takin harsatna an tawk mek a, pawisawi lo thisen a chhuak tam tawh hle bawk. Mi tam tak himna zawngin kan ramah an rawn raltlan tih pawh News aṭangin kan hriat ṭheuh tawh kha. 

Zanin hian LPS leh Zonet ṭangkawp chuan chung Myanmar raltlante pual chuan LIBERTY FOR MYANMAR Charity Concert an buatsaih dawn a ni. Dar 8-ah programme an ṭan ang a, LPS Studio-ah kan ram top artist-te an zai anga a, chu chu LPS leh Zonet-in an live dawn bakah YouTube lamah live-in an pe chhuak bawk ang.

Zaithiam zai tur an ṭha dawn
Zaithiam inlan tur an ṭha dawn a, tunlai Gospel leh Lengzem singer huhang ngah ber ber an inlan dawn. Chung zingah chuan zaithiam chuai thei lo, tunhnaia Myanmar-a mipui rorelna tundina a awm leh theihna atana beihpui thlak mekte a thlawpna hla ṭha tak rawn tichhuaktu Vanlalsailova pawh a tel a, ani bakah hian Lalduhsaki, Jaui, Kimkima, Maruati, Hlimhlimi te pawh an tel.

Rosy Remsangpuii, Sangteii Khuptong, Jonathan Lianhna, Young Fella, Mazuali K, One in Christ, Fiona Pachuau leh Jerry Lalrinawma te pawh an zai dawn. Chumai a la ni lo, live band kan hmun dawn bawk. Zonun Band-in Myanmar Idol Benjamin Sum an thawhpui dawn a ni. Myanmar Idol meuh zai kan ngaithla thei tur pawh hi a lawmawm a, eng ang taka zaithiam nge a nih i hriat duh chuan zanin concert hi lo chhim ve ta che.
 

Special appearance
Tunlai boxer lar, WBC World Youth title, Superfeather Weight champion Lalrinsanga Tlau (Sangte) chu zanin hian a inlan dawn. Chumai a la ni lo, Miss Mizoram 2017 Rody H Vanlalhriatpuii a inlan dawn bawk.

Donation pek dan tur
LIVE Phone-In hmangin donation a pek theih dawn a, Myanmar raltlante ṭanpuina tur ipe duh a nih chuan Zanin hian Zonet leh LPS chuan show chhung zawngin LIVE Phone In-na tur number an tarlang ang a, chumi kaltlang chuan pawisa a thawh theih dawn a ni.  LPS leh Zonet News reader-te an lo ṭhu dawn a, anni hi Pu Vana'n a lo ho ang.

Zonuni Pachuau, Zonet chu host a ni dawn a, Zonet & LPS aṭangin thusawi ngaihthlak tur a awm dawn bawk a ni.

Zai turte
Vanlalsailova, Laduhsaki, Rosy Remsangpuii, Sangteii Khuptong, Jonathan Lianhna, Young Fella, Mazuali K, Maruati, Hlimhlimi, One in Christ, Fiona Pachuau, Jerry Lalrinawma, Jaui leh Kimkima.