Carrie Underwood Gospel album thar My Savior

American Idol star Carrie Underwood chuan Zirtawpni liam ta khan album thar 'My Savior' a tlangzarh. 

'My Savior' hi a studio album pariatna ni tawhin Capitol Records Nashville kaltlanga a tlangzarh a ni a, Gospel album niin hla 13 a dah a, chung hlate chu Mizo-te pawhin kan hriat tak takte a ni hlawm.

Khawvela zaithiam lar ber zinga mi Carrie Underwood hi kum 2005 khan American Idol a ni a, zaithiam zinga hlawhtling ber pawl mah ni se a rinna chungchang erawh a thup ngai lo.  

NBC TODAY Show-a inlanna-ah pawh a album thara hlate hi a sa hlawm a ni. A album thara a hla dahte hi Mizo ṭawng pawha kan lehlina Biak inah pawh kan sak fo ṭhin a ni a, chung zingah chuan 'Nothing but the Blood of Jesus',  'Blessed Assurance', 'Just as I Am', 'Great Is Thy Faithfulness' leh 'Amazing Grace'-te pawh a tel.

Riff Magazine chuan,"Carrie Underwood-i music duhzawng hrechiangtu tan chuan, Gospel hla hlang awmna album a tichhuak hi thil mak a ni hran lo. A album thar ber 'My Saviour'-ah pawh hian hymn lar tak takte chu country leh pop hmangin, a aw mawi tak leh ngaihthlak nuam tak nen a sa chhuak a ni," tiin an fak hle.

Underwood hian Gospel album a tihchhuah chung-changah hian,"He album hi ka album siam duh ang reng ṭhin a ni a, kan tan chuan 'legacy' a ni," tiin nikuma Christmas album a tihchhuah hnu lawk khan a lo sawi tawh bawk.

A album thara hla pakhat 'Great Is Thy Faithfulness'-ah chuan CeCe Winans a thawhpui a, 'Jesus Loves Me' instrumental a dah tel bawk a ni.

Carrie Underwood hi Billboard 200 chart-a hmeichhia, country album pali topper nihpui thei awmchhun a la ni a, khawvel ram hrang hrangah record maktaduai 70 chuang hralh tawhin country artist hmeichhe zingah chuan thleng sang ber pawl a ni tawh. Grammy Award pasarih, Billboard Music Award 11 leh AMA 15 a dawng tawh a ni. Forbes phei chuan American Idol winner zinga hlawhtling berah a lo puang hial tawh bawk.