Indian Box Office-ah Godzilla vs Kong a che ṭha

Indian Box Office-ah Godzilla vs Kong a che ṭha a, hripui len hnua Hollywood film chet ṭha ber niin report ṭhenkhatah chuan tarlan a ni.

Godzilla vs Kong hian ni thum chhungin Rs Vaibelchhe 16.02 a lalut der a, hei hi Zirtawpni thlenga a sum lakluh kha a ni. Nilainia tlangzarh a nih khan trade analyst Taran Adarsh chuan Twitter-ah sakawlh pahnih insualna film hian Rs Vbc 6.40 a lalut nghal der tih a tarlang a, Ningani khan Rs Vbc 5.40 lalut lehin Zirtawpni khan Rs Vbc 4.22 lai a lalut leh a ni. Kartawpah khan sum a lakluh belh leh nual dawn tih a chiang sa bawk.

Alexander Skarsgard, Millie Bobby Brown, Rebecca Hall, Brian Tyree Henry, Shun Oguri, Eiza González leh Deadpool 2 star Julian Dennison-te channa Godzilla vs Kong hi India ramah chuan ṭawng chi li- English, Hindi, Tamil leh Telugu te'n an tlangzarh a, mahse English-a en an tam ber thung.

English leh Hindi version aṭang ringawta a sum lakluh hian Roohi leh Mumbai Saga-te sum lakluh aia tam fe sum a lalut niin India.com chuan a tarlang.