Ṭhazual Lengzem-ah A hmun ngaiah Jonathan Lalengzauva

Mizo Idol star Jonathan Lalengzauva chuan Ṭhazual Lengzem chart-ah a dinhmun ngai a luah a, a zawna ṭum hnih No.1 a hauhna a ni. 

Fela Colney chuan pa­hnih­na a hauh a, Mami Varte chu pathumna a ni. Dinhmun sang ber pawh lo luah tawh Jojo chu palina-ah awmin, F. Zomuanpuia chu top 5-ah a inhlangkai bawk. 

Pangzawl tlangval
Jonathan Lalengzauva hi a zaithiamna chu mipuiin an hmelhriatna a ni a, Pangzawl khua larpuitu a ni tel bawk. A hming lam rik tawh chuan rilruah Pangzawl a lang a, 'Pang­zawl tlangval' hian Zoram mipui min awi tlei tak zet a ni. 

Kumin January thla khan a music video hmasa ber 'Ka riang ngei e' tih chu a release a, a hit rem rem hle. He hla lungkuai tak hian beng a titlai tak zet a, Ṭhazual chart-ah a zawna dinhmun sang ber a luah pawh hi a mak lo. 

'Ka riang ngei e' tih hla hi a aw nen a inmil hle a, mi tam takin an ngiathla kham thei lo. A hla hi Landry Vl Vena Khawlhring phuah niin, music track hi Thangbawiha, EME Recording kutchhuak a ni. 

Mami Varte a inlar 
Zo rimawi khawvela hriat hlawh berte zinga mi Mami Varte hi hun eng emaw chen a reh hnuah February thla khan hla thar nen a rawn come back a, tunhma ang bawkin mipuiah a la tlana hle. 

Kum li hnua a music video hmasa ber hi 'Duhaisam' tih a ni a, ama phuah a ni nghe nghe. He hla hmang hian Ṭhazual chart-ah a dinhmun a siam rem mek zel a, tun ṭumah hian parukna aṭangin top 3-ah a inhlangkai a ni. 

'Duhaisam' hi nula tlang­val inngaihzawnna lam hla niin, February 14, Valentine's Day khan tihchhuah a ni. Chart-ah a inlar nghal a, zawi zawia hma sawnin tunah chuan a tum ram thleng turin a dinhmun a ṭha tawh hle a ni. 

'Damlai par' singer hian album a buaipui mek bawk a, a chhuah hun tur erawh hriat a la ni rih lo thung. 

Satel lem a 'hit'
Ṭhazual chart-a vawi eng emaw zat No.1 lo hauh tawh F. Zomuanpuia chuan tun hnai khan music video thar a siam a, 'Satel lem' tih a ni. He hla hi Mizo rilrem zawng tak niin thlan pawh a hlawh hle a, tunah chuan top 5-ah a inhlangkai leh der tawh a ni. 

F. Zomuanpuia hi Rpa Ralte ft G'nie-te chuan an dawt a, Temami leh Awm­tea Polymer te bakah, HT Lalthanzami  leh KR Robert te chu top 10-ah an an inhlang­kai ve bawk.