Box Office-ah Roreltu inthlak karah 'Dumbo' inlar Top 10-ah Hotel Mumbai
Tun hnaiah movie chhuak thar a awm nual a, Box Office-ah pawh roreltu an inthlak zak zak. Hetiang karah hian fantasy/adventure film Dumbo a rawn lang a, Captain Marvel leh Us te khumin sum lalut hnem ber dinhmun a luah.
Hetih lai hian kum 2008-a Taj Hotel, Mumbai beihna rapthlak tak thleng behchhana siam Mumbai Hotel chu top 10-ah a lang a, $mtd 1.2 lai a lalut.
Dumbo chu...
American filmmaker Tim Burton kutchhuak Dumbo hi March 27 khan Indonesia leh Nigeria-ah release a ni a, North America lamah pawh theatre hrang hrangah chhuah nghal a ni. Tun weekend chhung khan $mtd 52 zet lalutin pakhatna a hauh a, Us leh Captain Marvel sum lakluh a khum.
He fantasy/adventure film-ah hian Irish actor Colin Farrell leh French actress Eva Green te an chang a, hralh a kal rem rem hle. Tun weekend chhung khan theater 4,000 chuangah chhuah niin, heti zat sum hi a huilut ta a ni.
Dumbo hian tun hnai Box Office-a roreltu Us leh Captain Marvel te a khum miau avangin dahhniam theih a ni loa, ro a rel rei ang em tih chu zawhna awm mek a ni. Tun thla tawp lam hian kumina film chuak tur zinga boruak nei lian ber zinga mi Avengers: Endgame chu release a ni dawn a, roreltu thar a rawn inlar ngei dawn niin a lang.
Us vs Captain Marvel
Mystery/thriller film chhuak Us hi March 22 khan tlangzarh a ni a, Captain Marvel khumin Box Office-ah No.1 a hauh nghal. A kar khatnaah hian $mtd 71 zet a lalut nghal a, tun ṭumah erawh a sum lakluh a tlahniam nasa hle.
Us hian $mtd 40 lalutin pahnihna a hauh a, Captain Marvel chu pathumna a ni. American actress Brie Larson channa hian $mtd 20.4 a lalut a, Box Office aṭanga a sum lakluh tawh zat chu $mtd 825.1 a tling tawh a ni. Hetih rual hian khawvel hmun dang aṭanga a lakluhte nen chuan $tld 1 a chuang tawh a, kumina Hollywood film chhuak tawh zingah chuan 'hit' ber pawl a la ni.
Tun ṭumah hian Five Feet Apart, Wonder Park, How to Train Your Dragon : The Hidden World, The Beach Bum leh Unplanned te chu top 10-ah an lang a, A Madea Family Funeral pawhin $mtd 2.7 lalutin - sum thawkchhuak hnem zual zingah a tel phak bawk.
Hotel Mumbai
Kum 2008 November 26 khan hel pawl Lashkar-e-Taiba te chuan Mumbai-a Taj Hotel chu silai nen an luhkhung a, mi 100 tel teh meuh an thi a nih kha. He pawikhawihna rapthlak tak behchhana siam Hotel Mumbai hi March 29 khan tlangzarh a ni a, ngaihven a hlawh hle.
Theatre lamah pawh en hlawh berte zinga mi niin, tun weekend chhung khan $mtd 1.2 zet a lalut a ni. He film-ah English actor Dev Patel leh Iranian-British actress Nazanin Boniadi te an chang a, hel ten ni li chhung zet pawikhawihna rapthlak tak an thlen tir dan hrang hrangte tarlan a ni.
Hotel Taj attack hi India history-ah pawh chhiatna thleng rapthlak berte zinga mi niin, mi 174 an thi a, an zingah hian pawikhawitu Lashkar-e-Taiba mi leh sa pakua an tel bawk. Mi 300 chuangin hliam an tuar a, ram hrang hrang pawhin demna thu an chhakchhuak nasa hle a ni.