Gmail hmangtu tld 1.5 tling ta

American computer engineer Paul Buchheit chuan April 1, 2004 khan a duangchhuak a, tunah chuan mi tluklehdingawn 1.5 zet hmangtu an awm der tawh. 

'Gmail' tia kan hriat lar Google Mail hian April 1 khan kum 15 a tling a, tunah chuan khawvela electronic mail lar leh hman nasat ber a ni der tawh. Gmail hian monthly active user tld 1.4 vel nei anga chhut niin, Yahoo Mail chuan a hnaih ber. Yahoo Mail hian monthly user maktaduai 228 vel an nei a, Gmail an la thlau veng veng hle. Heng bakah hian AOL Mail leh Hotmail te chu a larzual an ni a, hmangtu erawh an la chuti teh lua lo thung. 

Gmail-ah hian 15GB free storage a awm a, tum khatah 25MB a rit thawnchhuah theih a ni. File lian zual te chu Google Drive hmang­in thawn theih a ni bawk a, hetih lai hian a dawngtu lam chuan 50MB thleng an dawng thei thung a ni. Google hnuaia service hrang hrang zingaah - Chrome, Android, Google Play, Maps leh YouTube te chu hman larzual an ni a, Google Maps phei chu map service zinga hman nasat ber a ni. 

Google hian kumin January thla khan mobile version Gmail an tichhuak thar bawk a, hei hian nasa takin nghawng a nei a - user pawh an tam phah niin a lang.