‘Black Adam’ tlangzarh hun tur a hriat ta

‘Black Adam’ film an siam meka a changtupa ber tur Dwayne Johnson chuan 'Black Adam' tlangzarh hun tur chu puang chhuakin nakkum July 29-ah tlangzarh a ni dawn tih social media kaltlangin a tarlang.

An ram huna Pathianni tlai khan Dwayne Johnson chuan NCAA tournament game-a  UCLA leh Alabama-te inkhelh hma lawkin fakna tawite hmangin Black Adam tlangzarh hun tur hi a puangzar bawk a, "DC Universe-a thiltihtheihna indawt dan chu thlakin a awm dawn," tiin a sawi a ni.

Instagram lamah Time Square-a a advertisement screen hrang hranga an pe chhuak lai chu a post zui bawk a, anti-hero Black Adam chu nakkum nipuiah chuan kan en hman ngei dawn niin a lang ta. Black Adam hi kum 1940 khan DC Comics-ah tihlan ṭan a ni a, a tirah chuan misual tak ni mah se muang changin anti-hero lam zawngin a character hi an her danglam hret hret a ni.

Kar hmasa lamah khan Black Adam-ah hian James Bond star Pierce Brosnan chuan Dr Fate lemah a chang dawn tih tihchian a lo ni tawh bawk a, chu vang chuan Justice Society of America line-up tur chu eng emaw chen a hriat theih ta a ni. Aldis Hodge chu Hawkman lemah a chang dawn a, Atom Smasher lemah Noah Centineo chu chang dawn bawkin Cyclone lemah Quintessa Swindell chu a chang dawn bawk.