Celine Dion World Tour nei leh dawn

'My Heart Will Go On' singer Celine Dion chuan World Tour a neih leh tur thu a puang a, fan te tan chanchin lawmawm tak a ni ngei ang.

Celine Dion hi Nilaini khan Ace Hotel Theater, Los Angeles-ah a inlan a, tour a neih tur thu hi a puang a ni. Fan te pawh an phur hle a, music khawvel a dengchhuak hneh hle bawk.

Kum 51 mi Celine Dion hian 2009 khan 'Taking Chances World Tour' a nei a, hemi hnu hi chuan a reh zui deuh vang vang a ni. Rin loh takin World Tour a neih tur thu a puang leh ta a, September thla aṭangin a ṭan dawn a ni.

Canadian singer hian November thla khian a studio album 12-na tur 'Courage' chu a tichhuak dawn a, hemi pual hian tour hi a nei dawn a ni. Hei hi world tour a neih ṭum hnihna tur a ni dawn a, a tawpna tur pawh a ni tawh hial mai thei bawk.

'Courage World Tour' hi September 18 khian Quebec City, Videotron Centre-ah kick-off a ni dawn a, nakkum April thla thleng a awh dawn a ni.

Album thar
Canadian legendary singer hian tour a neih tur thu a sawi rual hian album thar chungchang pawh a sawi lang a, a buaipui mek tih a sawi. 'A album thar tur hi 'Courage' a ni dawn a, a tour title atan a hmang zui dawn bawk a ni.

Celine Dion hian kum 15 chuang zet Las Vegas residency a neih tawh chu June thla hian a tawp tawh dawn a, music khawvelah a hun tam zawk a hmang thei tawh dawn a ni. Las Vegas-ah hian ṭhangkhat lian chuang zet hun a hmang tawh a, amah gei pawhin 'Second Home' tia a sawi hial a ni.

He hmunah hian a pasal fanau te nen an khawsa a, a pasal René Angélil chu 2016 khan a boral a - fa pawh pathum lai an nei hman a ni. 'Because You Loved Me' singer Celine Dion chuan, "Kan fate pawh an puitling chho ṭan a, tunah chuan music lamah pawh nasa zawkin ka inhmang chho thei dawn a ni. Chutih rual chuan an kianga ka awm loh rei ber tur a ni dawn a, a harsa dawn hle a ni," tiin, tour a neih chhunga a fate kianga a awm lo tur chu a huphur thu a sawi lang bawk.