Samsung 5G smartphone hmasa ber tlangzarh

Smartphone siam­chhuak­tu company hrang hrangte chu 5G siam­chuak hmasa ber nih tum­in an intlansiak a, a tawp­ah Samsung bawk an dingchang leh ta. Samsung hian nimin khan khawvela 5G Smartphone hmasa ber hi Seoul-ah an tlangzarh a, South Korea chu 5G service hmanna hmasa ber a ni nghal bawk.

South Korean company lar Samsung hian 5G an tihchhuah tur thu hi an lo puang lawk tawh a, an model chhuanvawr Galaxy S10-ah a hman theih a ni. Galaxy S10 5G hi khawvela 5G smartphone hmasa ber a nih miau avangin marketing lamah pawh che ṭha viau tura ngaih a ni. Samsung hian March thla khan Galaxy S10 hi an lo tlangzarh tawh a, S10+ leh S10e-te pawh a chhuak tawh bawk.

Company chuan thu­chhuah siamin fifth-generation communication technology hman theiha tlangzarh a ni ta chu lawm­awm an tih thu sawiin, South Korea bakah khawvel hmun dangah pawh release chhoh zel a nih tur thu an sawi. 5G hi a speed a ṭha viau dawn a, movie pawh hun reilote chhungin a download zung zung theih tawh dawn a ni.

Samsung ten 5G an tlang­zarh hnu lawk hian American telecom­munication company Verizon chuan Chicago leh Minneapolis-ah te 5G service hi an pe ve nghal a, South Korean wireless telecommunication com­pany - SK Telecom, KT leh LG Uplus te an che ve leh nghal bawk.

Samsung hian 5G smartphone hi tlangzarh tawh mah se a duh apiang hnenah an pechhuak nghal ngawt dawn loa, hmang tur bik an la bithliah rih dawn tih an sawi.

South Korea-ah hian LG chuan 5G smartphone V50 ThinQ chu tlangzarh tumin hma an la ve mek bawk a, May thla tir lamah tihchhuah hman an tum a ni.

Hetih rual hian Chinese company Vivo pawhin 5G smartphone tihchhuah tumin hma an la ve mek bawk a, India ramah pawh a hma lamah tlangzarh theih an inbeisei thu an lo sawi tawh a ni. Vivo hian 2016 aṭang khan Beijing-ah 5G research institute centre dinin bul an lo ṭa tawh a, tihchhuah hnaih an inbeisei tawh a ni. Huawei, Xiaomi leh OPPO-te pawhin 5G hi tichhuah tumin hma an la mek bawk.