Setana pheikhawk vangin Nike-in MSCHF an khing

Tunhnaia pheikhawk chanchin ngah tak, internet khawvela lar tak, Brooklyn-a hmunpui nei art collective MSCHF leh rapper Lil Nas X-te thawkdunin an siam chhuah Setan Shoes chu miin an sawisel nasa hle a, chutiang karah chuan Nike company pawhin MSCHF chu an khing.

Lil Nas X leh MSCHF thawkdunin pheikhawk an tlangzarh Setan Shoes an tih hi March 29 khan tlangzarh a ni a, BBC report dan chuan $1,018 (Rs 74,110) man niin kraws letling a awm a, mihring thisen far khat awm telin, pentagram dah a nih bakah Luka 10:18 tih a inziak bawk a, Nike Air Max 97s siam danglam niin pair 666 chiah an siam bawk.

Nike erawh an lawm lo hle a, trademark infringement thubuai thehlutin US District Court for the Eastern District, New York-ah MSCHF an khinna hi an thehlut. Nike chuan Setan Shoes chu an pawmpui loh thu leh an remtihna tel loa siam a nih thu an sawi a, MSCHF chu an pheikhawk zawrh lai chu titawp tira, an ‘Swoosh design’ mark lar tak an lo hman ve tawh lohna turin Court-ah hekna an theh lut a ni.