Music video thar nen Rachel Lalnunkimi

Nikum August thla khan hla hit zet mai 'Mai a lum e' a tichhuak a, Zoram dung leh vang a deng chhuak hneh hle a nih kha. Rachel Lalnunkimi chuan music video nalh tak mai a rawn nei leh ta a, tun ṭum chu 'Dam takin mangṭha' tih a ni ve thung.

He hla hi Siama (Vul­mawi) phuah niin, Rachel-i hian nalh a tih em avangin a phuahtu hnenah hian sak a dil rawih mai a ni. Racheli-i chuan, "He hla hi mawi ka tiin ka duh em em a, ka dilna te min tih hlawhtlin sak a, phal taka min sak tir avangin ka lawm hle a ni," tiin, a hla thar chungchang a sawi.

'Dam takin mangṭha' tih hla hi Vulmawi album pathumnaah khan an band guitarist Buata'n mawi takin a lo sa tawh a, Racheli hian a rawn sa thar ve leh ta a ni. A aw nen pawh a inmilin ngaihthlak a nuam a, belhchian a dawl hle.

He hla hi Mizo rilrem zawng tak niin, hla nem 'cool' tak mai - thluk mawi leh hla thu ṭha tak a ni. A nihna ang tak hian Racheli hian a sa chuak thiam hle a, a music video hmasa nen inpersan viau mah se, a thiamna tak tak a pholang ti ila kan sawi sual awm lo e.

A kalphung

Rachel-i music video thar hi YouTube-a upload tur bik liau liaua siam a ni a, a video pawh a simple hle. Music video pangngai anga siam a ni lo a, YouTube video style-a simple taka shoot a ni.

He tih rual hian belh­chian a dawl a, music video siam lama kuthnu mam berte zinga mi Mawitea Hauchhum (RDS Shots) kutchhuak a ni. Music leh recording hi EME Records produce a ni thung.

Rachel-i music video thar 'Dam takin mangṭha' tih hi EME Records YouTube channel-ah upload niin, zanin aṭangin en tur a awm dawn a ni.