Priyanka Chopra Marvel movie-ah inlan dawn?

Avengers: Infinity War, Captain Marvel, Black Panther leh Guardians of the Galaxy te hi Marvel Cinematic Universe kutchhuak vek an ni a, an sulhnu ropui zia sawi nawn a ngai lo.

Khawvel huapa film star lar ber berte pawhin an movie siamah inlan an chak a, hetiang karah hian Indian actress Priyanka Chopra hming pawh lam rik a ni nawlh mai. 'Russo Brothers' an tih mai American film & television director lar Joe Russo leh Anthony Russo te chuan film an siam leh dawn a, chutah chuan Priyanka hian inlanna hun remchang a nei thei dawn niin media-te chuan an tarlang.

Joe Russo leh Anthony Russo te hi tun hnai khan India-ah lo kalin Avengers: Endgame tihlar nan hma an la a, Mumbai-ah thuthar thehdartute an kawm a ni. Hemi ṭum hian an project thar tur chungchang sawi lan a ni a, comic book superhero 'Kamala Khan' chu film-ah siam tumin hma an lak mek thu an puang a ni.

He film-ah hian tute nge chang dawn a la hriat loha, Bollywood star zingah inlan ve tura duh an neih leh neih loh te pawh an zawt a ni. Hei hi Joe Russo chuan chhangin, "Duh thlang thei chu ni ila Priyanka Chopra ka thlang ngei ang. Amaherawh chu engmah sawi theih a la ni loa, thu mai a la ni," tiin a sawi.

Priyanka hi Kamala Khan-ah hian a inlan dawn tihna a la ni loa, he film siamtu tur Russo Brothers ten Bollywood star zinga thawhpui atana an duh ber chauh a ni a - inchhuanna tham erawh a tling thung!

Russo Brothers kutchhuak zingah hian - Thor: Ragnarok, Iron Man leh Spider-Man: Homecoming te pawh a tel a, tunlai superhero movie lar ber berte hi an kutchhuak deuh vek a ni.