ACM Award sem a ni ta Kacey Musgraves bawk a langsar

Kum tina sem ṭhin Academy of Country Music (ACM) award chu nimin zing khan Grand Gar­den Arena, Las Vegas-ah sem a ni leh ta a, American singer Kacey Musgraves bawk a langsar.

Kacey Musgraves hian Grammy Award-ah mi bik a nih zia a lo pho lang tawh a, ACM Award-ah pawh mimala langsar ber niin - Artist of The Year leh Album of The Year award te a hum haw.

Kum ṭha bik!

'Golden Hour' singer Kacey Musgraves tan kumin hi 'kum ṭha bik' tih loh chi rual a ni loa - music lama chawimawina ngaihhlut ber ber a hui deuh vek. Music industry-a chawimawina ngaihhlut ber tih ngam Grammy Award-ah khan award pali zet a hui a, chung zingah chuan Album of The Year leh Best Country Album te pawh a tel. Heng bakah hian Best Country Solo Performance leh Best Country Song te a la bawk.

Country music huanga chawi­mawina ngaihhlut ACM Award-ah Artist of The Year atan thlan a nih bakah, 'Golden Hour' hmangin Album of The Year a la leh bawk. Kacey Musgraves hian nikum March thla khan studio album palina 'Golden Hour' a tichhuak a, a hlawhtlinpui rem rem hle. Grammy leh Academy of Country Music huangah award hlu tak tak paruk zet a hui avangin dahniam chi rual a ni lo.

Artist of The Year chu...

Artist of The Year a nih tawh chuan dahniam chi rual a ni loa, award ngaihhlut ber pakhat a ni ṭhin. Tun ṭumah hian American singer Thomas Rhett leh Kacey Musgraves te chuan he chawimawina hi an la a, fak an phu hle.

Kacey Musgraves hlawh­tlinna sawi thui a ngai loa - 'Marry Me' singer Thomas Rhett tan he chawimawina hi ban phakah a awm tih nem­nghehin a awm bawk. Anni pahnih hi tunlai country singer zingah chuan boruak nei lian ber pawl an ni a, Artist of The Year atan thlan an ni pawh hi a awm viau a ni.

Hetih lai hian Luke Combs chu New Male Artist of The Year atan thlan a ni a, hmeichhe lamah Ashley McBryde chuan he chawimawina hi a la thung a ni.

Dan + Shay

American country music duo Dan + Shay te an ropui a, award pathum lai an hui. Duo of The Year leh Song of The Year an lak bakah, 'Tequila' chu Single of The Year atan thlan a ni bawk. An hla hit 'Tequila' hi Song of The Year atan thlan niin, hlawhtlinna an chan theihna kawngah a pui nasa hle.

Hetih lai hian Australian singer Keith Urban chuan Entertainer of The Year a la ve thung a, country music huangah a mikhual loh zia a tarlang nawn. Chris Janson chuan Video of The Year a la ve bawk a, Old Dominion ten Goup of The Year award an la thung.

Dierks Bentley leh Brothers Osborne te chuan Music Event of The Year an la a, Shane McAnally chu Songwriter of The Year atan thlan a ni bawk.

Tute nge perform?

Award ceremony-ah hian American Idol hmasa ber Kelly Clarkson a perform a, Jason Aldean nen an inlan dun a ni. Carrie Underwood a inlar bawk a, George Strait leh Miranda Lambert ten lawm an hlawh hle a - Lambert hi ṭum 25 a perform-na a ni.

Dierks Bentley leh Brandi Carlile ten stage an luahlum ṭha viau a, Kane Brown leh Khalid te perform laiin thawm a ṭha hle. Country singer lar Keith Urban leh Blake Shelton te an langsar a, Shelton hi Gwen Stefani chuan a hmunah a ṭawiawm bawk.

Country music icon Reba McEntire chuan 54th Academy of Country Music Award hi a host a, ṭum 16 zet a host-na a ni tawh.