Nungcha humhalhtu pawl PETA-in Sairang naupang chawimawi dawn

Nungcha humhalh kawnga hma latu pawl, Peo­ple for the Ethical Treat­­ment of Animals (PETA) India chuan Sairang naupang Derek C. Lalchhanhima hnenah chawimawina an hlan dawn. Derek-a hi nungcha chunga ngilneihna a lantir avangin Compassionate Kid Award an hlan dawn a ni.

PETA India Education & Youth Outreach Manager Puja Mahajan chuan hemi chungchang hi sawiin, "Kum ruk mi Derek C. Lalchhanhima thiltih hian rilru a khawih tak zet a, mipui rilru pawh a hneh hle a ni. Nungcha humhalh kawngah zirtirna ṭha tak a pe a, chawimawi hi a phu tak zet a ni," tiin a sawi.

Sairang naupang Derek-a hian thirsakawr hmang­­in an ṭhenawmte arte a chil palh a, a nunna chhan tumin a nu pek cheng sawm kengin Sairang damdawi in a pan pui a ni. Arte nunna hi chhan thei lo mah se, a thiltih hian mi rilru a hneh tak zet a, a school kalna St. Pio School te pawhin chawi­mawina an hlan hial a ni.

Nungcha chunga a ngilhneihna hi India rama media lian hrang hrangte pawhin an tarlang nasa hle a, ram pawn media ṭhenkhatah hmuh tur a awm bawk. Hei hi PETA India pawhin lo hriain, award hi an hlan dawn ta a ni.

PETA India hian Com­­passionate Citizen prog­ramme an kalpui a, nungcha humhalh kawnga en tawn tlak - naupang kum 8 - 12 inkar te hnenah award hi an hlan ṭhin a ni.