Box Office-ah Sum lalut hnem ber Shazam!

Swedish filmmaker David Sand­berg-a kutchhuak Shazam! chuan Box Office-ah sum lalut hnem ber dinhmun a luah a, Pet Sematary chu pahnihna a ni. Hetih lai hian tun hnaia No.1 inhauh chhawk zak zak - Dumbo, Us leh Captain Marvel te chu top 5-ah an la awm bawk.

Hei le Shazam! chu...

Kumina film chhuak tur zinga ngaihven hlawh ber pawl Shazam! hi April 4 khan Russia-ah release a ni a, a tir aṭang phatin a hit nghal hle. He fantasy/science fiction film hian tun weekend chhung khan $mtd 102 zet a thawkchhuak a, heng zinga a zatve aia tam chu North America aṭanga a lakluh a ni. Box Office aṭanga a lakluh hi $mtd 53.5 niin, sum lalut hnem ber a ni.

American film star Zachary Levi leh Grace Fulton te channa hi tun hnaia film chuak thar zingah chuan en hlawh ber a ni chho mek a, khawvel ram hrang hrangah hralh a kal hle a ni. Mihring tamna China, Brazil leh Indonesia ṭang pawhin sum a lalut hnem hle a, Korea leh Europe lamah pawh a che ṭha hle.

Pet Sematary

Thriller/horror film Pet Sema­tary hi April 4 khan Indonesia leh Australia-ahte tlamgzarh a ni a, a boruak a lian nghal viau. Shazam! nen an innanchin avangin beisei angin a che ṭha tawk lo thung a, a sum lakluh pawh $mtd 24.5 a ni.

He film hi Kevin Kolsch leh Dennis Widmyer te kutchhuak niin, Australian film actor Jason Clarke leh American actress Amy Seimetz te chevel a hmuhnawm hle a ni.

Kar hmasa lama pakhatna luahtu Dumbo chuan $mtd 18.2 lalutin top 3-ah a inham tang a, Us chu palina a ni thung. American actress Brie Larson channa Captain Marvel chu a sum lakluh tla hniam deuh tawh mah se, $mtd 12.4 lalutin top 5-ah a lang bawk.

The Best of Enemies, Five Feet Apart leh Unplanned te chu sum lalut tam zual an ni bawk a, Wonder Park leh How to Train Your Dragon: The Hidden World te chu top 10-ah an lang bawk.