Vanlalruati'n award dawng
Confederation of Indian Industry (CII) chuan Positive Women Network president Vanlalruati chu HIV/AIDS dona kawnga a thawh ṭhat avangin Woman Examplar Award an hlan.
CII hian India rama midang te hriselna kawng leh an hmalam hun atana fuihtu leh kawng kawhhmuhna lama thawk ṭha bik te hnenah award hi an hlan ṭhin a, Vanlalruati hian a dawng ta a ni. CII hian April 4 khan Taj Palace, Delhi-ah annual meeting an nei a, he hunah chawimawina hi an hlan a ni. He hun hmanpuitu Union Minister of commerce, Industry & Civil Aviaton Suresh Prabu chuan Vanlalruati hnenah hian chawmawina hi a hlan a, award hian cheng nuai thum leh citation a keng tel a ni.
Award dawng tur hian India rama grass root-a thawk ṭha mi 260 zet chhawpchuah an ni a, Vanlalruati hnenah hian hlan a ni ta a ni. Chawimawina dawng tur thlanna hi uluk taka kalpui niin, CII ten field visit neiin Mizoramah pawh hun an rawn hmang a ni. Personal interview, field visit leh kum tam tak chhunga hna an lo thawh tawh te endik a ni.
Award hi category thum- enterpreneur, education leh health sector-ahte ṭhen niin, enterpreneur hi Goa lamin an la a, Jharkhand miin education lamah award a la thung. Health sector-ah erawh Mizo kan chungnung a, Vanlalruati kutah Woman Examplar Award 2019 hlan a ni ta a ni