Billboard-ah Justin Bieber a ni deuh tawp!
Billboard chart hrang hrangah Justin Bieber a che ṭha rem rem hle a, kar tina an chart tihchhuah ṭhin, miin an ngaih hlut zual zawng zawng deuh thawah topper a ni!
Billboard Album 200, The Hot 100, Artist 100, Streaming Songs chart, Global 200 chart leh Global 200 Excl. US-ah te chuan pakhatna a ni fai vek.
'Justice' a ropui e
Canadian singer hian March 19 khan a studio album parukna 'Justice' a tlangzarh a, a hit nghal rem rem hle a ni. He album hi ram hrang hrang 10 chart-ah topper a ni nghal a, US Billboard 200 chart-a pakhatna a nihna tur hian album equivalent unit 154,000 lai a hmu chhuak a ni.
A album a tlangzarh aṭanga ni 10 chhung lekin Recording Industry Association of America (RIAA) chuan gold certify a pe nghal a, critics lam pawhin he a album thar hi an fak rawn a ni ber. Billboard 200 chart-ah hian kar 10 lai ro lo rel tawhtu Morgan Wallen 'Dangerous: The Double Album' chu a nek chhuak ta a ni.
Record-in a umzui
Kum 27 lek la ni mah se US album chart-a No.1 album pariat lai a nei ta. Solo artist zingah hetiang dinhmuna ding thei naupang ber hi a ni hial!
Justice bakah hian Changes, Purpose, Believe: Acoustic, Believe, Under the Mistletoe, Never Say Never: The Remixes EP leh My World 2.0 te chu Billboard 200 chart-ah hian topper a lo nihpui tawh a ni. Chumai a la ni lo, Hot 100 leh Billboard 200 chart-a a ruala topper ni thei mipa solo artist hmasa ber a ni bawk.
Hot 100-a pakhatna Peaches
Daniel Caesar leh Giveon-te a thawhpuina 'Peaches' chu kar liam ta chhunga hla lar ber tih loh rual a ni lo. Billboard Hot 100 chart mai bakah Global 200 chart pahnihah pakhatna a ni.
Hot 100 chart-ah chuan Cardi B 'Up' chu pahnihna a ni thung a, Silk Sonic (Bruno Mars & Anderson .Paak) 'Leave The Door Open' chu pathumna a ni bawk.
Album 200 chart-a pahnihna Lana Del Rey
Billboard 200 chart-ah chuan Justin Bieber dawt chiahah Lana Del Rey a awm a, a album thar 'Chemtrails Over The Country Club' chu pahnihna a ni. Del Rey hian Bieber-a 'Justice' tlangzarh niah tho he a album thar hi tlangzarhin Bieber erawh a tluk zo ta lo deuh a ni.
Morgan Wallen 'Dangerous: The Double Album' chu kar 10 chhung lai chart topper a nih hnuah Lana Del Rey leh Justin Bieber-te hnuaiah a awm a ngai ve ta thung a, pathumnaah a tawlh thla ve thei ta hram a ni. Pop Smoke 'Shoot For The Stars Aim For The Moon' chu palina a ni a, Dua Lipa album 'Future Nostalgia' chu top 5 khartu a ni bawk.
'Future Nostalgia' hi kar 51 lai mai chart-ah hian a cham tawh a, top 10-ah hun eng emaw chen a lan tawh loh hnuah kar hmasaah khan pathumnaah a rawn invawrh leh thut a, tunah erawh panganaah a awm a ngai ve leh ta a ni.