Mizo TV Series thar 'Roses' Zonet-ah entheih dawn

Mizo TV Series thar 'Roses' chu July 7 hian premiere a ni dawn a, Zonet TV channel bak­ah Zonet digital platform-ah tihchhuah ṭhin a ni ang.

'Roses' hi Zonet Original Series a ni a, film leh series siam lama sulhnu nei ṭha tak Leitlang Pictures siam a ni a, a hmuhnawm ngei ang tih a rin ngam. Script hi Dr Zarzosanga, Serchhip ziah a ni a, fiction niin 'suspense thriller' film a ni dawn a, episode pariat a awm ang. Kar khatah episode pahnih an tichhuak ṭhin dawn a ni.

Hotel room pakhara ruang chhar chungchang chhuina series a ni dawn. Police-te'n case an tihtawp hnua chanchinbumi pakhatin a chhui zui dan a ni dawn a, Mizo film danga kan la hmuh ngai lo ang 'script' danglam tak kan hmu dawn a nih hmel.

Director Mapuia Chongthu chuan,"Script pathum lai ka hnawl hnuah he script hi ka hmu a, suspense script angah chuan a ṭha ber pawl a niin ka hria. Film making lamah pawh chona lian tak min pe a, theihtawp ka chhuahin ka hria a; a thu pawh kan phawkchhuak nalh viauin hriatna ka nei. Kan film siam tawhah chuan ka chhuan ber pawl a ni," a ti.

Mizo film hnuhnawm ber ber leh changkang tak tak lo siam tawhtu Mapuia Chongthu-in an film siam tawh zinga a chhuan ber pawl chu a hmuhnawm dawn tih a chiang.

Zonet Director LV Lalthan­tluanga chuan Leitlang Pictures an thawhpui thei chu lawmawm a tih thu a sawi, "Leitlang Pictures nen kan thawkho thei hi ka lawm takzet a, an hnuhma/kutchhuak enin 'Roses' pawh hi a hmuhnawm leh ngei a rinawm. Covid-19 avanga kharkhip karah he TV series hian min awi se, mahni in lamah hmuhnawm ti taka Zonet chhungkuate'n in lo en ṭheuh ka beisei a ni," tiin series thar an tichhuak tur chu phurawm a tih thu a sawi a ni.