One in Christ-in Ruatdiki pualin hla thar tichhuak

One in Christ chuan an member May 22 a boral ta Lalruatdiki Chhangte pualin Inrinni khan music video pahnih 'Lalpa ka engkim' leh 'I lam ka rawn hnaih' chu an YouTube-ah thlira ngaihthlak theihin an dah chhuak.

Music video thar an tihchhuah pahnihah hian Lalruatdiki hi a la tel ve ve a ni. OiC Leader leh founder Alvin Lalruatfela chuan, "Heng hla pahnih 'Lalpa ka engkim' leh 'I lam ka rawn hnaih' kan han dah chhuah tharte hi nikum June thlaa Thenzawla kan soot a ni a, kan album 'Kei kher maw Lalpa?'-ah khan dah a ni a, tun hi kan phawrh chhuahna hmasa ber a ni," tia sawiin," Kan member min boralsan ta Ruatdiki lanna kan neih chhun a ni tawh a, keimahni pawhin kan hlut hle a ni," tiin Vanglaini a hrilh.

OiC hian Ruatdiki pual bik liau liau hla thar siam an tum mek a, Inrinniah vek khan ASAFA Studio-ah recording pawh an nei fel tawh a ni. 'Nang ka hnenah I awm si a' tih a ni dawn a, Chris MS Dawngkima phuah niin June thle tawp emaw July thla tir velah emaw chuan peihfel hman an tum bawk.

'Lalpa ka engkim' leh 'I lam ka rawn hnaih' hi OiC hian an YouTube channel-ah an dah a ni.