Blackpink YouTube-ah record an siam leh ta

South Korean pop band Blackpink chuan YouTube-ah record thar an siam leh ta a, viewer maktaduai 100 nei rang ber an ni. Blackpink hian Korean pop star Psy khumin record hi an siam a, an ropuina sawi nep chi rual a ni lo.

'Ddu-Du Ddu-Du' singer hian April 4 khan 'Kill This Love' music video an tichhuak a, hei hi ni hnih leh darkar 14 chhung lekin mi mtd 100 chuang zetin an view a ni. Hei hi YouTube chanchina viewer maktaduai 100 nei rang ber niin, namai lo tak a ni.

An ti mai mai lo!

Member pali awmna Blackpink-te hian YouTube-ah record an lo siam nual tawh a, tun ṭuma an record pawh hi a theu neu lo hle. Psy-a'n a hla hit 'Gentleman' hmanga record a lo siam tawh chu khumin, viewer maktaduai 100 nei nei rang ber an ni a, darkar 24 chhunga viewer ngah ber an ni cheu bawk.

An music video thar 'Kill This Love' hi darkar 24 chhungin mi maktaduai 56.7 zetin an en a, Ariana Grande record an khum. Ariana Grande hian nikum November thla khan 'Thank U, Next' a tichhuak a, darkar 24 chhungin vierer 55.4 zet a nei. Hei hi Blackpink te hian an rawn khum a, an ti mai mai lo tih a lang.

BTS, Taylor Swift leh Emi­nem te chu record nei ṭha zual an ni bawk.

Group naupang

Blackpink te hi kum 2016-a indin chauh an ni a, an sulhnu erawh a namai lo hle. Band naupang te ni mah se tunah chuan khawvel an dengchhuak der tawh a, an hawina lam apiangah lawm an hlawh em em zel bawk.

Jisoo, Jennie, Rosé leh Lisa te hi February thla khan Good Morning America (GMA)-ah an inlan a, US-a an inlan ṭum khatna chauh a la ni. Khawvel ram ropui ber US-ah hian fans an ngah a, sawmna pawh an dawng hnem hle. New York Fashion Week-ah an inlan hnuah, tunthla hian music festival lar leh lian ber pawl Coachella Festival-ah an perform leh dawn bawk.

K-pop hmeichhe band zingah U.S chart-a thleng sang ber an ni bawk a, an music video hit 'Ddu-Du Ddu-Du' chu K-pop group music video zinga viewer ngah ber a ni bawk.

Blackpink hian YouTube-ah record an siam mawlh mawlh a ni ber a, K-pop zinga YouTube-a viewer ngah ber record an siam hnu­­ah, subscriber ngah ber din­hmunah an inhlangkai a, maktaduai 20 zet an nei. K-pop mai ni lo khawvel huapa viewer maktaduai 100 nei rang ber record an siam leh tak avangin -an chanchin hi media-te buaipui ber pakhat a ni chho mek.