Mandy Moore inlar hnai

American singer leh actress ni bawk Mandy Moore chuan hun rei tak music a chawlhsan hnuah hla thar a buaipui thu a sawi leh ta a, fan te tan chanchin lawmawm tak a ni ngei ang.

'Candy' popstar hian a hla sak tur a phuah thu leh, music video chhawpchhuah thuai a tum thu a sawi. Mandy Moore chuan, "Kum eng emaw zat chu ka lo chawl ve ta reng mai, tunah chuan music huanga zuanglut turin ka inpeih leh ta. Ka ṭhiante leh ka pasal Taylor Goldsmith ten min pui nasa a, ka lawm tak zet a ni," tiin a sawi.

Kum 35 mi Mandy Moore hi nikum khan American folk rock band 'Dawes' guitarist Taylor Goldsmith nen an innei a, music huangah tawn hriat an ngah dun hle. Taylor Goldsmith hian a music video thar tur tan pawh hian a pui nasa hle a nih a rinawm a, a nupui hi a thlawp ṭha hle niin an sawi.