Space X-in NASA astronaut pahnih space-ah an kap chhuak

Private rocket company Space X chuan Inrinni khan National Aeronautics and Space Administration (NASA) astronaut pahnih orbit-ah a thawn chhuak ta a, commercial space travel tana bung tharah mi tam takin an ngai.

Billionaire entrepreneur Elon Musk-a SpaceX-in US astronaut pahnih Doug Hurley leh Bob Behnken an tirh chhuahna hi Falcon 9 tiin a hming an vuah a, an ram huna Inrinni tlai dar 3:22 khan an kap chhuak a ni. 

NASA hian kum kua liam taah khan space shuttle program an tawpsan a, hemi hnua US aṭanga space-a inkap chhuak leh hmasa ber chu Inrinnia inkap chhuakte hi an ni nghe nghe. Hemi a nih avang hian Inrinnia Space X space mission hi US chuan a ngaihlu hle a, Russian rocket leh capsule hmanga International Space Station (ISS)-a an mite an tirh ṭhin chu tunah chuan anmahni ram ngei aṭangin an tir ve thei tawh dawn a ni.

Doug Hurley leh Bob Behnken-te hian nimin khan ISS an thlen beisei a ni a, an cham chin tur hriat ni lo mah se thla li vel chu an cham an ring.

Space X hi private company zinga orbit-a mihring tir hmasa ber an ni a, ram ang pawhin US, Russia leh China chiahin an la tithei a ni. Inrinni hi an company tan hian mel lung pawimawh tak a ni a, kum 18 liam taa din chauh la ni mah se space-ah rocket an kap chhuak der tawh.

NASA leh Space X hian $tluklehdingawn 2.6 hu contract an ziak a, ISS-ah hian ṭum ruk vel mi tirh an tum. Heng zinga mission pathum hi chu August thla lam hma ngeiin kalpui hman an tum bawk.