Emilia Clarke-in Thlalak edit-na App a hua!

Game of Thrones (GOT) star Emilia Clarke chuan thlalak edit-na application a huat thu leh, khap se a duh thu a sawi chhuak mauh mai.

English actress hian MissVogue magazine hnenah hemi chungchang hi sawiin, thlalak tih danglam chuan nghawng ṭha lo tak a nei thei a ni, a ti. Emilia Clarke chuan, "Photoshop leh online photo editing application-te hian thil ṭha lo tak a hring chhuak ṭhin a, thlalak duh dak lo tak tak a darh nasat phah hle a ni. Social media lamah inpek kual zung zung a awlsam avangin kum lama naupang zawkte tan pawh a him lo hle a ni," tiin a ngaihdan a sawi chhuak.

Kum 32 mi Emilia Clarke chuan sawi zawmin, "Thalak ṭhenkhat chu khawi nge dik zawk pawh hriat hran har khawpin tih danglam ṭhin a ni a, hei hi a tuartu tan chuan a na hle a ni. A bikin hmeichhiate tan a runthlak em em a, mimal zahawmna thlengin tih bawrhban a nih phah fo a ni," a ti bawk.

GOT star chuan social media hman kawngah a fimkhur thu a sawi lang bawk a, mi ṭhenkhat an nihna baka lan mawi tumte chu a dem thu a sawi. Emilia Clarke chuan, "Kan taksa leh hmelhmang chu eng pawh ni rawh se, kan pawm mai tur a ni a - tih danglam chiam a ṭulna a awm lo," a ti bawk a ni.