Mizo TV serial thar '0389'

Hindi serial, Korean serial leh serial hrang hrang kan en ṭhin a, tun aṭanga hun rei loteah Mizo serial pawh en tur a awm ve dawn ta! Zonet Original TV serial tur '0389' chu July thla lama chhuah ṭan turin hmalakna kalpui mek a ni.

He TV serial hi Zonet leh Believing is Seeing Projek (BISP) te ṭangkawpin an siam tur a ni dawn dawn a, Mizo TV serial hmasa ber tura ngaih a ni. 0389 hi Zonet-ah chauh chhuah tur a ni dawn a, episode 12 vel awm tura beisei a ni. He serial-a changtu turte hi buaipui mek an ni a, tun thla tawpah shooting ṭan tum a ni. A hming 0389 a nih ang ngeiin - Aizawl nunphung behchhana chan chhuah tum a ni.

Zonet General Manager, LV Lalthantluanga (Tatoa) chuan, "Mizo ten hnamdang serial lehlin kan en nasa em em a, hmuhnawm kan ti thei hle - chuvang chuan he project pawh hi a hlawhtlin ngei a rinawm. Thawhpui ṭha tak BISP kan nei hi kan lawm a, serial hmuhnawm tak chhawpchhuak turin theih tawp kan chhuah dawn a ni," a ti

BISP producer/director Raymond Colney pawhin, "Ṭhian ṭha leh classmate ten career ṭha tak tak an thlan sap sap lai a, Mizorama eizawnna ber atana tlak loha kan ngaih ṭhin film making kan zir chhoh ve ṭan tirh aṭanga kan lo suangtuah ve ṭhin a ni a. Zonet nen ṭangkawpa kan siam thei tur hi mumang a ang lek lek zawk a, an inphalna leh Mizoram media hmasawnna atana hma thlir thui tak an nei hi keini Believing Is Seeing Projek-te chu kan lawm takzet a ni," a ti.

"Filmmaking leh acting lama tui tam tak te tana career siam sak hi kan tum lian tak a ni a, Mizoramah film culture dik tak leh industry workflow introduce hi kan tum lian tak a ni bawk. Tuna kan serial siam turah hian Zonet, Kings & Prophets leh BISP Film School graduate te kan in collaborate a, Mizo te tana content en tur hei aia tam zawk siam zel hi kan tum a ni,", tiin a sawi bawk.

Mizo TV serial chhuak thar tur '0389' hi a nghahhlehawm tawh tak zet a, serial ngainatute tan pawh chanchin lawmawm tak a ni ngei ang.