Olivia Rodrigo ‘Drivers License’ A la vul zel e

Olivia Rodrigo single hit tak mai 'Drivers License' chu chart hrang hrangah topper ni tawh lo mah se a la theuneu lo hle a, Billboard chuan Ningani khan kumin chhunga hla, global stream-a tluklehdingawn kai hmasa ber a nih thu an puang leh mauh mai.

MRC Data aṭanga a lan dan chuan kar riat chhung lai Billboard Global 200 chart-a No.1 ni thei American tleirawl zaithiam hla hian kar hmasa khan he record hi a siam a, vawi tld. 1.033 lai stream a ni tawh.

Olivia Rodrigo 'Drivers License' dawtah hian BTS 'Dynamite' chu a awm thung a, he hla hi vawi maktaduai 685.98 lai stream a ni tawh bawk.

High School Musical: The Musical: The Series star hian January 8 khan 'Drivers License' hi a tlangzarh a, a beisei phak bakin a hit. Billboard Global chart pahnih leh Hot 100 chart-ahte chuan kar tam tak chhung topper a nihpui nghal a, a hla pakhat tihchhuahna lek siah khawvel hriatin a lar nghal a ni.

Billboard Hot 100-ah phei chuan zaithiam, chart-a hla hmasa ber topper nihpui thei naupang ber a ni hial.

He hla hi Recording Industry Association of America (RIAA) chuan double platinum-ah a puang tawh a, US mai bakah Belgium, Denmark, Finland, Israel, Malaysia, Portugal, leh Singapore bakah ram dang eng emaw zatah No.1 a nihpui bawk a ni.

Chumai a ni lo, Spotify lamah pawh a che ṭha rem rem hle a, holiday hla ni lo, ni khata stream tam ber record vawi hnih lai a siam! January 11 khan ni khatah Spotify-ah vawi mtd 15.7 lai stream a ni a, record a siam. A la duhtawk loa, a tukah vawi mtd 17 lai stream a ni lehnghal!

Hla thar a chhuak, album thar a hnai

Ningani khan Olivia Rodrigo hian a single pahnihna 'Deja Vu' a tichhuak a, YouTube leh streaming service hrang hrangah stream theihin a awm tawh. 'Deja Vu' a tlangzarh dawn thu hi Thawhṭanni khan social media kaltlangin a puang lawk a, a 'hit' viau mai thei a ni.

A hla thar tihchhuah niah hian May 21-ah album thar tihchhuah a tum thu a sawi nghal bawk a, he album-ah hian 'Drivers License' leh 'Deja Vu' te pawh hi a dah nghal dawn. A album hming tur hi '*O*R' tiin a dah lailawk a, a official title leh a tracklist erawh a la tarlang lo.