‘New Gods’ leh ‘The Trench’ siam leh dawn lo

DC Film an buaipui mek pahnih Ava DuVernay buaipui 'New Gods' movie leh Aquaman spin-off 'The Trench' te chu Warner Bros. chuan siam a ni leh dawn lo tih an puang.

'New Gods' film script hi director tura an biak fel Ava DuVernay leh comic book writer Tom King-te chuan an ziak a, Justice League-a misual Darkseid inlan lehna tur film a nih bakah Mister Miracle, Big Barda, Granny Goodness leh Highfather-te pawh inlan tur an ni a, mahse he project hi tawpsan a ni leh ta tih Warner Bros. chuan an puang a, ui fe fe an tam hle ang.

Aquaman spin-off 'The Trench', Aquaman director James Wan produce tura an tihfel tawh pawh an tawpsan leh ta a, he film hi Aquaman-a misual Trench-te chungchang tur a ni.

Heng film project pahnih tihtawp a nih chungchang hi The Hollywood Reporter chuan tarlang hmasa berin, hemi hnu hian Ava DuVernay pawhin twitter lamah a rawn tichiang ve leh bawk a ni.