Batmobile thar tur thlalak tlangzarh

Robert Pattinson channa nakkuma tihchhuah tur 'The Batman'-a Batman car 'Batmobile' tur thlalak chu kar hmasa khan Matt Reeves chuan twitter-ah a tlangzarh.

A thlalak tweet-ah hian Batmobile hi angle thuma a lanna a awm a, a bulah Pattinson-a 'Batman' niawm tak a ding bawk. Batman film danga Batmobile kan hmuh tawh ṭhin nena khaikhin chuan a danglam hle a,  classic American muscle car chei danglam a ang ber. 1960's hunlaia an car Chevy Camaro emaw Dodge Charger emaw a ang hle.

The Batman-ah hian Penguin-ah Colin Farrell a chang dawn a, Catwoman tur chu Zoe Kravitz a ni tih tihchian a nih tawh bakah The Riddler-ah Paul Dano chu a chang dawn bawk.  Jeffrey Wright chuan James Gordon-ah a chang dawn nia sawi a ni a, Peter Sarsgaard pawh cast zingah sawi lan a ni bawk.