Ṭhazual Lengzem-ah Fela Colney hun a rawn herchhuak ta

Ṭhazual chart-ah vawi eng emaw zat a lo lang tawh ṭhin a, dinhmun sang ber luah tur meuh erawh chuan hun a mamawh rei hle. Fela Colney tan hun ṭha a her chhuak ta nge nge a, a hla hit 'Sensiari' hmangin dinhmun sang berah a rawn inhlangkai.

Tun ṭumah hian chart hmasa lama No.1 hauhtu Jonathan Lalengzauva chu pahnihna-ah awm ve thungin, Mami Varte chuan 'Duhaisam' tih hla hmangin pathumna a hauh ve bawk.

Sensiari chu...

Fela Colney hian nikum No­vember thla khan a music video pahnihna 'Sensiari' hi a tichhuak a, a hlawhtlinpui hle. Ṭhazual chart-ah pawh top 10-ah vawi eng emaw zat langin, tun dinhmun hi a thleng ta a ni.

'Sensiari' tih hla hi Biakkima (L) phuah niin, hranghlui zaithiam Pachhunga'n a lo larpui tawh ṭhin kha a ni a - Fela Colney hian thiam tak maiin a rawn sa thar ve leh a ni.

Hruaia CZ kutchhuak music nalh taka thuam niin, recording hi Foster Recording-ah tih a ni. Video pawh hi Valtea (Foster Recording) kutchhuak tho a ni. Fela Colney hian a music video hmasa ber 'Ka hmangaih che Grace' tih chu nikum April thla khan a tichhuak a, 'Sensiari' hi a pahnihna a ni thung.

Mami Varte

Mami Varte chuan 'Duhaisam' tih hla hmangin pathumna a hauh a, No.1 kai turin a dinhmun a siam rem chho zel. He hla hi ama phuah niin, February thla khan a tichhuak a ni. Zonet Cable leh MDM YouTube lamah pawh en a hlawh hle a, top 3-ah a inhlangkai pawh hi a mak lo.

Chart-ah hian Awmtea Polymer leh Temami te chu top 5-ah inhlangkaiin, F. Zomuan­puia leh Jojo te chuan an dawt. F. Zomuanpuia hian 'Satel lem' tih hla hmangin chart-ah dinhmun pawimawh a luah cho zel a, dinhmun sang ber a thleng a nih pawhin a mak lo ang.

Fakmawia Fanai, KR Robert leh H.T Lalthanzami te chu top 10-ah an lang ve bawk.