‘The Chosen’ Season 2 A en theih ta

Isua Krista chanchin behchhana siam TV series ‘The Chosen’ season 2 chu Easter Sunday niah tak tlangzarh a ni ta. 'The Chosen' en ṭhinte tan chuan thu lawmawm tak a ni ngei ang.

American filmmaker Dallas Jenkins siam ‘The Chosen’ hi season 1-na tihchhuah tawh niin entute'n an pawisa thawhkhawm hmanga siam TV Series sum lalut tam ber a ni hial a, season 1-ah chuan episode pariat awmin December 14, 2017 khan a season hmasa hi an tichhuak ṭan a; hun eng emaw chen an chhunzawm loh hnuah tunah chuan season 2 an tichhuak dawn ta a ni.

‘The Chosen’ danglamna em em chu, a thlawnin a en theih a ni. Duh chuan a en man ni kher loin, a series siamtute hnenah pawisa a thawh ve theih reng a, pawisa thawh ṭul i ti kher lo a nih pawhin a thlawn vekin streaming platform hrang hrang kaltlangin i en theih a, Mizote'n kan hman thiam em em YouTube platform-ah pawh duh hun hunah a en theih reng a, Playstore-ah a application download-in a en theih tawh bawk.

Season 1 kha khawvel ram zawng zawng deuhthawah entu an awm a, ṭawng hrang hrang chi 50 laia lehlin niin mi maktaduai 92 velin an en tawh anga chhut a ni. Season 2 hi ET huna nizan dar 8 (Kan ram hunah chuan tukin dar 5:30) khan tlangzarh a ni a, an tlangzarh livestream changtu ringawt pawh hi Facebook leh YouTube-ah an ṭhahnem hle niin CCM Magazine chuan an tarlang.

‘The Chosen’ film siamtu Dallas Jenkins hi rinna lam hawi film siam kawngah a insawrbing deuh tawp a tih theih a, Isua lema chang Jonathan Roumie chuan season 2-ah hian Dallas Jenkins chuan season hmasa aia nasa zawka hma a lak thu sawiin, hmalakna leh thil engkim chu a hautak zawk bakah a lian zawk tih a sawi.

Season 2-ah hian episode pakua a awm dawn a, season hmasaah khan $mtd 10 lai an hmu chhuak a, season 2 aṭana an budget an neih tawh bakah season 3 atan pawh $mtd 2 lai an nei leh tawh niin media ṭhenkhatah chuan tarlan a ni.

"Isua dik tak kha tun huna mi tluklehdingawm chuang hnenah lantir leh kan duh a ni; kan show hmang hian chu chu lantir kan duh a ni," tiin Dallas Jenkins chuan season 2 tlangzarh hun tur a puan ni khan a lo sawi tawh a, season 2 pawh hi season hmasa ang bawk khan a thlawnin a en leh theih dawn.

Season 2 hi an la chang zo chiah loa, mahse pek chhuah ṭan an tum tawh tho a, a siamna atan pawh an budget aia sang sum an hmang tawh tih Jenkins chuan a sawi a; hei hi Covid-19 hripui leng vang a nih thu a sawi.