Friends HBO Max Reunion a thleng tak tak dawn ta

'Friends' fan-te tan chuan a beidawnthlak tawh hial zawk mai thei! Nikum lamah khan kan en hman dawn emaw tih tawh mahnak alaiin Covid-19 hripui leng vangin an sawn hla zel a, a tawpah phei chuan tiam chin awm loin 'Friends' HBO Max Reunion show chu an sawn hla a, tunah erawh an chang ṭan tak tak tawh dawn a, vawiin aṭang hian an chang ṭan tawh dawn nia tarlan a ni.

Jennifer Aniston, Courteney Cox, Lisa Kudrow, Matt LeBlanc, Matthew Perry, leh David Schwimmer-te inhmukhawm leh tur hi 'Friends' hmuhnawm ti taka lo en tawh ṭhinte tan chuan thu lawmawm tak a ni dawn tih a hriat sa a, an tihchhuah hun tur la tarlang chiah lo mah se an tihchhuah vat erawh a rinawm.

'Friends' star-te hi nikum February thla tawpa reunion show nei tura production ṭan tura koh khawm tum an ni a, mahse hripui leng vangin an sawn hla zel a, tunah erawh bul an ṭan dawn ta tak tak niin a lang. Variety-in a tarlan dan chuan Jennifer Aniston, Courteney Cox, Lisa Kudrow, Matt LeBlanc, Matthew Perry, leh David Schwimmer-te hian an special reunion show atan hian $maktaduai 2.5 ṭheuh an dawng dawn a ni.

'Friends' hi season 10 lai tihchhuah niin episode 236 lai a awm a, September 22, 1994, aṭanga May 6, 2004 thleng khan tihchhuah a ni a, khawvel hmun hrang hrangah fan pawh an ngah hle a, award pawh eng emaw zat an dawng nghe nghe.