Box Office Shazam! a chungnung Beisei phak lo Hellboy
Tun hnaiah supernatural film chhuak thar a awm a, boruak nei viau tura ngaih a nih laiin North American Box Office-a roreltu erawh a ngai a la ni. Fantasy/science fiction film Shazam! chuan a zawnin sum lalut hnem ber dinhmun a luah a, tun weekend chhung khan $mtd 25.1 a lalut.
Hetih lai hian Hellboy erawh beisei angin a che ṭha tawk lo a, $mtd 12 lalutin pathumna a hauh phak ṭawk. He supernatural film hian Shazam! leh tun hnaia film chhuak thar dang Little te a tluk lo a ni.
A zawnin kar hnih
April 5 khan release a ni a, Box Office-ah No.1 a hauh nghal. Ni 10 liam hnuah pawh a dinhmun ngai a la luah thei a, a sum lakluh erawh a tlahniam thung.
Swedish filmmaker David Sandberg-a kutchhuak Shazam! hian kar hmasa khan $mtd 53.5 a lalut a, tun ṭuma a lakluh erawh $mtd 25.1 a ni thung. Heti chung hian a ṭum hnih nan sum lalut hnem ber a la ni pha tho a ni.
He fantasy/science fiction film hian khawvel hmun hrang hrang aṭangin $tld 1 a lalut tling der tawh a, a hit lo tih chi rual a ni lo. American film star Zachary Levi leh Grace Fulton te channa hi tun hnaia film chuak thar zingah chuan en hlawh ber a ni mek.
Hellboy chu...
American film star David Harbour, Milla Jovovich leh Sasha Lane te channa hi tun hnaia film chhuak thar zingah chuan en hlawh ber tura ngaih a ni a, a boruak pawh a lian viau. Hetih rual hian rin ang hehu chuan a che ṭha teh chiam lo a, tlangzarh karah $mtd 12 a lalut a ni.
American comics artist Mike Mignola-a graphic novel behchhana siam Hellboy hi Bristish film director Neil Marshall kutchhuak niin, April 10 khan Indonesia-ah tlangzarh a ni. Khawvel hmun hrang hrangah chhuah chhoh mek niin, a sum lakluh pawh hi a la san chhoh zel a rinawm.
Tun ṭumah hian comedy film chhuak thar Little chuan $mtd 15.4 lalutin pahnihna a hauh a, thriller/horror film Pet Sematary chuan $mtd 10 a thawk chhuak leh bawk.
French actress lar Eva Green channa Dumbo chu top 5-ah lang bawkin, a sum lakluh zat chu $mtd 9.1 a ni. Dumbo hi Captain Marvel leh Us ten an dawt a, After, Missing Link leh The Best of Enemies te chu top 10-ah an lang ve bawk.