Mizoram-ah Royal Enfield 650 Twins
India ram khawpui dangah pawh hmuh tur la awm zen zen lo Royal Enfield 650 Twins chu Mizoramah lei theih turin chhawpchhuah a ni ta rup mai.
Royal Enfield Twins 650cc hi Aizawl-a dealer Lawma Enfield chuan nimin khan an phochhuak a, booking a tih theih nghal a - booking awmsa te pe chhuak turin an inbuatsaih mêk bawk. Interceptor leh Continental GT launch rual hian RE Trails pawh launch tel nghal a ni.
Royal Enfield 650 Twins hi India ram khawpui lian ho-ah hralh chhuah phawt a ni a, a tahtawlin khawpui dangah te pekchhuah ve zêl a ni. Tunah hian North East-ah chuan Guwahati-ah chiah hralh chhuah a la ni a, Aizawl hi hralh chhuah theih tura thlan chhuah leh awmchhun a la ni rih.
He bike hi Europe khawmualpui lama an test fe hnuah nikum September khân USA-ah tlangzarh a ni a, a company awmna India-ah pawh nikum November aṭang khân hralhchhuah ṭan a ni. Royal Enfield hi MidSize motorcycle segment (250-800cc)-ah chuan khawvêla chungnung ber an ni mêk.