Hollywood-ah Alia Bhatt?

Bollywood star lar chak tak Alia Bhatt chu Hollywood lamah a zuanglut dawn nia sawi a awm a, thu chiang erawh hriat tur a la awm lo.

Kum 26 mi Alia Bhatt hi Indian actress zingah chuan hriat hlawh ber te zinga mi niin, film chang tura sawmna pawh a dawng hnem hle. Tun hnai khan Ranveer Singh nena an channa Gully Boy chu tihchhuah niin, 'Kalank' bakah film dang channa tur a nei nual bawk.

Hetih karah hian Hollywood lama inlan tur anga sawi awm hian mipui beng a verh hle a, Bollywood star dangte hnung a zui ve mai ang em tih chu zawhna awm mek a ni.

Tun hnai khan media te hmaah, "Hollywood-a inlan hi ka lo suangtuah ṭhin a ni a, a thleng thut thei a - a hnai viau mai thei bawk," tiin a sawi a, hei hian ngaihven a hlawh hle a ni. Indian actress zingah Priyanka Chopra leh Deepika Padukone te chu Hollywood lama tawn hriat nei ṭha an ni a, Alia Bhatt hian an hnung a zui a nih pawhin a mak lo ang.