India ramah 'TikTok' khap a ni ta

Video sharing appli­ca­tion 'TikTok' chu India ramah khap a ni ta a, Apple leh Google te pawh­in application store aṭangin an remove nghal.

Madras High Court chuan he application hi mipat hmeichhiatna rawngkai thehdarh nan mi tam takin an hmang tih sawiin, India ramah khap a nih theih nan hma an la a ni. Hemi chungchang hi Thawhlehni khan court chuan a ngaihtuah a, khapna thupek hi a tichhuak zui ta a ni. Company lam pawhin India ramah 'ban' a nih thu hi tarlangin, application store aṭanga paih nghal a nih thu an sawi.

TikTok hi Chinese com­pany ByteDance chuan kum 2016 khan an launch a, video siamna application lar chho mek te zinga mi a ni. Hetih lai hian a hmangtu lamin thil ṭha lo lamah an pawhpen avangin khap a lo ngai ta hial a ni.

Tun dinhmunah Tik­Tok hmangtu hi India-ah ringawt pawh mi maktaduai 120 vel awm anga chhut niin, a hmangtu tam zawk hi ṭhalaite an ni. He App hmang hian awlsam takin video a siam theih a, mahni hla duh zawng awlsam takin a lip-sync theih bawk avangin hmangtu pawh an tam chak hle. Khapna thupek hian nghawng a nei lian hle tura ngaih a ni.

TikTok hi India bak­ah, Bangladesh-ah khap a lo ni tawh bawk a, US-ah pawh khap a nih theih nan hma lak mek a ni bawk. US-ah bik hian nikum October thla khan application download nasat ber a ni hial.