ṬHAZUAL GOSPEL Maruati zaiin ngainat a hlawh ZUAL ZELIN

Mystical Mizoram Ṭhazual Gospel chart-ah Maruati chu pakhatna a ni a, a hla 'Zual Zelin Ka Fak Chak Hle Che' tih chu pakhatna a nihpui.

Kum hnih chhung a zawna Zonet Ṭhazual Award-a Best female artist Gospel award dawng thei Maruati zai chuan ngainatu a la ngah zel a, Ṭhazual chart-ah pawh pakhatna a rawn ni leh ta a ni.

'Zual Zelin Ka Fak Chak Hle Che' tih hi hla thar a ni lo a, mi tam takin kan hriat sa, Kristian Hla bu No 66-na kha niin kum tam tak liam tawha Rev. E.Rowlands lehlin a ni. Maruati hian a sa mawi hle a, lungkuai tak leh nung taka sa chhuakin ngaihthlak a manhla a, music video pawh a hmuhnawm a, chuvang chuan pakhatna dinhmuna a rawn ding ta pawh hi a phu viau.

'Mawi Tawp Berin' hitmaker Maruati hi a hla tihchhuah apiangin ngaihthlak a hlawh em em zel a, Mizote'n a zai kan ngaina tih a hriat a, YouTube lama a zai a dah chhuahte chuan thlirtu nuai chuang an nei fur hlawm a ni.

Pahnihna OiC 
One In Christ hla mawi tak 'Lalpa Ṭhatna' chu pahnihna a ni thung. 'Lalpa Ṭhatna' hi 'Goodness Of God' Mizo ṭawnga Alvina lehlin niin a mawi hle a, YouTube lamah pawh vawi nuai thum chuang lai mai thlir a ni tawh. Pakhatna dinhmunah a rawn inhlangkai a nih pawhin a mak lo ang.

Hlimhlimi, Searphic Choir leh Ruatsanga
Hlimhlimi 'Aw Ropui Ber' chu pathumna a ni a, Seraphic Choi 'An Leng Za Tawh Ang' chu palina niin Vanlalruatsanga Chhawnchhek chuan 'Kan Ngen A Che' tih hla hmangin top 5 a khar thung a ni.

Top 10-a langte
Ṭhazual Gospel chart top 10-ah chuan C. Muani, David Vanlalpeka, Sailo Lalsangzuali, Ronne & Boom leh Chanmari West Hmar Veng Br KṬP-te pawh an lang a ni.