MDM-in General Assembly hmang President thar Dr. Zothansanga

Music Domain Mizoram (MDM) chuan April 17, Nilaini khan David's Kitchen, Chanmari-ah General Asssembly vawi nga-na an hmang a, hruaitu thar an thlang nghal a ni.

He hunah hian MDM artist te an kal ṭha hle a, president atan Dr. Zothansanga chu lungrual takin an thlang a ni. He hun hi Shift li-ah ṭhen a ni a, shift khatnaah hian Office Bearers thlanna neih niin; Lalchuailova, Deputy Director, Art & Culture Department chuan R.O. niin a hmanpui.

David Lalliansanga, Asst. Professor leh B. Lalramenga, Advocate te pawhin PO niin he hun hi an hmanpui bawk. O.B atana thlan chhuahte chu :-

1.President - Dr. Zothansanga

2. Vice President - David Lalvensanga

 (David Sonata)

3. Gen. Secretary - JH Lallungmuana

4. Asst. Secy - Lalnunkenga Chuaungo

5. Treasurer - Stacy VL Muanpuii

6. Fin. Secy - Sawmtea chhangte

A thawh hnihnaah General Assembly hunpui hman a ni a, rorel inkhawmin a chhunzawm. Rorel inkhawmah hian MDM leh Mizoram rimawi khawvel hmasawnna tur tam tak rel niin, hma lakna tur eng emaw zat an duang a ni. David’s Kitchen neitu David Lalhmangaiha chuan MDM T-shirt release-na hun a hmang a, MDM member te hnenah a thlawnin sem a ni. David’s Kitchen buatsaih zanriah tuihnai tak an kilho bakah, Variety programme nuam leh hlimawm tak an hmang zui a - tunlai zaithiam lar ber ber te an zai a, games hmanga intihhlimna hun nuam tak an hmang bawk.

He programme hlawhtlin theihna tura sponsor tu David’s Kitchen neitu pa David Lalhmangaiha leh midang mi inphal tak takte chungah leh video coverage tihsaktu ZONET chungah MDM chuan lawmthu an sawi a ni.