Hailey Bieber Cosmetic lamah kal ve dawn

American reality star Kylie Jenner chuan hlawhtling takin 'Kylie Cosmetic' a din a, khawvela billionaire ni thei naupang ber a ni hial. Model Hailey Bieber pawhin Cosmetic line din ve a tum thu a puang a, a trademark tur pawh 'Bieber Beauty' tih a ni ang.

Canadian singer lar Justin Bieber-a nupui Hailey hian sumdawnna bul ṭan tur hian nikum August thla khan United States Patent and Trademark Office-ah dilna a lo thehlut tawh a, an chingfel hnai niin media te chuan an tarlang. Hailey hi L’Oréal-ah brand ambassador lo ni tawh a ni a, ModelCo nen an lo thawkho tawh bawk.

Kum 22 mi American model hian modeling lamah tawnhriat a lo nei nual tawh bawk a, Levi’s leh Adidas te nen an lo thawk ho tawh ṭhin a ni. Sulhnu a lo neih tawh te hmang ṭangkaiin Cosmetic line din a tum ta rup mai a, a hlawhtlinpui ang em tih chu hunin a la hril dawn a ni. Fashion product 'Hailey Bieber' din tumin a bei mek bawk a, a hlawhtling a nih chuan Bieber family te hian music, fashion leh cosmetics lamah sumdawnna an kalpui dawn tihna a ni.