US-ah billionaire an tam ber India-ah mi 106 an awm
American business magazine lar Forbes chuan billionaire tamna ram a puang chhuak leh ta a, US chuan dinhmun sang ber luahin, China chuan a dawt. Germany chu pathumna niin, billionaire 106 awmna India chu pali-na a ni.
Hetih lai hian kum hmasa aiin billionaire hi an tlem zawk a, US leh Brazil te chu kum hmasa aia mi hausa tawntaw neih belh ram awmchhun an ni. A bak zawngah chuan billionaire awm zat hi a tlahniam vek a, nikum lama lang mi 55 te chu hmuh tur an awm tawh lo bawk.
America an chungnung
Khawvela ram ropui ber an ni a, mi hausa pawh an kawl hnem ber. Forbes tarlan dan chuan US-ah hian billionaire 607 zet an awm a, ram dangte nen an inthlau hle. Anmahni hnaih bertu China chuan billionaire 324 kawlin, Germany leh India phei chuan 100 chuang awrh chauh an nei a ni. Khawvel puma billionaire awm zat chu 2,153 niin, US leh China-ah ringawt hian billionaire awm zawng zawng zatve deuh thaw an kawl tihna a ni. Forbes billionaire list-ah hian top 20-a lang mi 14 te chu American an ni a, an chungnung hle.
American zingah hian Amazon CEO Jeff Bezos chu a hausa ber a, Bill Gates leh Warren Buffett bakah, Mark Zuckerberg leh Larry Page ten an dawt a ni. Khawvela hausa ber nihna chelh mektu Jeff Bezos hausakna hi US Dollar tluklehdingawn 135 zet a ni.
China an tlahniam
China hi khawvela ram ṭhangchak leh hmasawn ber te zinga mi a ni a, amaherawh chu billionaire ngah lamah chuan kum hmasa an pha lo thung. Nikum khan billionaire 373 an nei a, kuminah erawh mi 49-in an tlahniam a ni. Khawvel puma billionaire tlak hniamna hi 55 a ni a, Chinese an tam lawr lak tihna a ni.
Hetih lai hian billionaire ni thar zinga hausa ber chu Chinese Colin Huang a ni a, web retailer Pinduoduo neitu a ni.
India dinhmun
India chuan billionaire 106 neiin, US, China leh Germany te chu a tluk loh awm chhun an ni. Indian zingah billionaire list aṭanga paih mi pariat an awm laiin, newcomer panga chauh an awm thung a - kum hmasa aiin mi pathumin an tlem a ni. Indian zingah hian Reliance Industries chairman Mukesh Ambani chu a hausa ber a ni.
Hmeichia an tlem
Forbes billionaire list-ah hian hmeichhia an lang tam lo hle a, top 20-ah phei chuan mi pahnih chiah an lang. French author Françoise Bettencourt Meyers leh Alice Walton te chu top 20-a inhlangkai awmchhun an ni a, anni pawh hi rokhawm vanga hausa an ni.
Hetih lai hian kum 21 mi Kylie Jenner chuan billionaire ni thei naupang ber dinhmun a luah thung.
Forbes hian 2001 aṭang khan billionaire list hi a tichhuak a, hetih lai hian khawvel pumah billionaire 564 chauh an la awm. Kum 2019 a herchhuah meuh chuan billionaire hi mi 2,153 zet an tling tawh a, list thar berah hian billionaire ni thar ringawt pawh mi 195 zet an awm a ni.