Adele leh a pasal Simon inṭhen

Kum 2016 khan induhtawn takin an inkutsuih a, tunah erawh an inṭhen thuin khawvel a dengchhuak leh ta! English singer Adele leh a pasal Simon Konecki te hian Kristian te ni pawimawh 'Good Friday' ni khan an inṭhen thu an puang a, mipui a barakhaih hle.

'Hello' singer Adele leh investment banker Simon te hian an inṭhen chhan hi an tarlang lo a, inhriatthiam tawnna thui tak nen a hranga khawsak zai an rel a ni ber. Kum 2012 khan fapa Angelo Adkins an nei a, fa an neih aṭanga kum li hnuah an innei zui a ni. Adele leh Simon te hi an inneih hma hian kum nga zet an lo inzui hman a, an inneih aṭanga kum nga pawh a vei hmain an inṭhen leh ta a ni.

English singer ropui berte zinga mi Adele hi kum 30 mi chauh a nih laiin, a pasal Simon Konecki hi kum 45 mi lai a ni tawh a, an inkarah kum 15 zet a tla a ni.